काठमाडौं (हाम्रो खेलकुद) – नेपाल भलिबल संघले आसन्न १३औं दक्षिण एसियाली खेलकुद (साग) को लागि पुरुष राष्ट्रिय भलिबल टोलीको मुख्य प्रशिक्षकमा नेदरल्यान्डका लेस्ले डि जोङलाई नियुक्त गरेको छ ।

संघका महासचिव जितेन्द्र बहादुर चन्दका अनुसार नतिजाका आधारमा लेस्लेलाई सागसम्मको लागि पुरुष टोलीको मुख्य प्रशिक्षकमा नियुक्त गरिएको बताएका छन् । गत वर्ष इन्डोनेसियामा भएको एसियाली खेलकुदमा पनि लेस्लेले राष्ट्रिय टोलीलाई प्रशिक्षण दिएका थिए । उनलाई करिव ४ हजार युरोमा अनुबन्ध गर्ने प्रयास भइरहेको र यसका लागि राष्ट्रिय खेलकुद परिषद (राखेप) मा प्रस्ताव गरिएको संघ महासचिव चन्दले जानकारी गराए ।

महासचिव चन्दले नतिजाका आधारमा हान एबिङ र लेस्लेमध्ये लेस्लेलाई छनोट गरिएको र उनीबाट घरेलु मैदानमा आयोजना हुने १३ औं सागमा टोलीले राम्रो नतिजा निकाल्ने आशा राखिएको बताए । लेस्लेको प्रशिक्षणमा नेपालले २० टोली सहभागी एसियन गेम्समा १५औं स्थान हासिल गरेको थियो ।

हान एबिङले नेपालमै गत साउन भदौमा नेपालमै आयोजना भएको एभीसी एसियन सेन्ट्रल जोन सिनियर मेन्स भलिबल च्याम्पियनसिपमा नेपाली राष्ट्रिय पुरुष भलिबल टोलीलाई प्रशिक्षण दिएका थिए । उनले टोलीलाई तीन महिना लामो प्रशिक्षण दिएपनि नेपाल सेन्ट्रल जोनमा पाँचौ स्थानमा खुम्चिएको थियो ।

नेपाली टोली सागकै बन्द प्रशिक्षणका लागि भारत जाने तयारीमा छ । भारत भलिबल फेडेरेसनको निमन्त्रणामा नेपालले भारतमा प्रशिक्षणका साथै केही अभ्यास खेल खेल्नेछन् । लेस्ले नेभेम्बर १० मा नेदरल्यान्ड्सबाट सोझै नेपाली टोलीमा सामेल हुन भारते जाने सम्भावना रहेको संघले जनाएको छ ।