विविध सुवेदी, ब्रिसबेन
श्रीलंकाविरुद्धको तीन टि ट्वान्टी सिजन अष्ट्रेलियाले जितेको छ । श्रीलंकालाई दोस्रो टि ट्वान्टीमा बुधबार ९ विकेटले हराउँदै अष्ट्रेलियाले अन्तिम खेलअघि नै सिरिज जितेको हो । पहिलो खेलमा घरेलु टोली १ सय ३४ रनले विजयी भएको थियो ।

१ सय १८ रनको लक्ष्य अष्ट्रेलियाले १३ ओभरमा १ विकेट गुमाएर भेट्टाएको थियो । ओपनर डेभिड वार्नर र पूर्व कप्तान स्टेभन स्मिथले अविजित अर्धशतक बनाएपछि अष्ट्रेलियाले सहज जित हासिल गरेको थियो । पहिलो ओभरमा घरेलु टोलीले आरोन फिन्चलाई शून्य रनमा गुमाएपछि वार्नर र स्मिथले दोस्रो विकेटका लागि अविजित १ सय १७ रनको साझेदारी गरेका थिए ।

वार्नर ६० र स्मिथ ५३ रनमा अविजित रहे । ४१ बल खेलेका वार्नरले ९ चौका र ३६ बल खेल्दै ६ चौका प्रहार गरेका थिए । श्रीलंकाका एक मात्र विकेट लासिथ मालिगांले लिएका थिए । त्यसअघि टस जितेर ब्याटिङ ब्याटिङ गरेको श्रीलंकाले १९ ओभरमा सबै विकेट गुमाएर १ सय १७ रन बनायो ।

टोलीका लागि कुशल परेराले सर्वाधिक २७ रन बनाएका थिए । ओपनर धनुस्का गुनातिलकाले २१, अभिष्का फर्नान्डोले १७, वानिन्दु हसरंगशा, इसुरु उडाना र लक्षण सान्दाकानले समान १० रन जोडे । अन्य कुनै पनि ब्याट्सम्यानले दोहोरो अंकमा रन बनाउन सकेनन् । घरेलु टोलीका लागि बेली स्टालाके, पाट कुमिन्स, अस्टोन एगर, र एडम जाम्पाले समान २ विकेट लिए ।