काठमाडौं (हाम्रो खेलकुद) – बन्द प्रशिक्षण र अभ्यासका लागि थाइल्यान्डमा रहेको नेपाली राष्ट्रिय महिला भलिबल टोली अभ्यास खेलमा तेस्रा जित हात पारेको छ ।

बैंककस्थित एसियाकै उत्कृष्ट भलिबल प्रशिक्षण सेन्टर एफआइभिवीमा बिहान भएको खेलमा नेपाली टोलीले जापानको यु–१८ टिममाथि ३–१ को सेटमा जित हात पार्दै अभ्यासमा तेस्रो जित हात पारेको हो । यसअघि नेपाल शुरुवाती दुई खेलमा विजयी भएपनि तेस्रो अभ्यास खेलमा थाइल्यान्डको यु–२३ टिमसँग पराजित भएको थियो ।

जापानलाई भलिबलमा निकै सशक्त मानिएपनि नेपालले उत्कृष्ट खेल पस्कदै जित निकाल्न सफल भयो । पहिलो सेट २५–१५ ले सहजै आफ्नो पक्षमा पारेको नेपालले दोस्रो सेट २०–२५ ले गुमाएको थियो । तर, त्यसपछिको दुवै सेटमा जापानी युथ टोलीमाथि नेपाली टोली २५–१६ र २५–११ ले विजयी रहन सफल भयो ।

बंगलादेशमा आयोजना हुने प्रथम एभीसी एसियन सेन्ट्रल जोन भलिबल च्याम्पयनसिप र स्वदेशमा आयोजना हुने १३औं दक्षिण एसियाली खेलकुद (साग) को थप तयारीका लागि नेपाली टोली २२ दिने बन्द प्रशिक्षण र अभ्यासमा रहेको नेपाली टोलीले ७ अभ्यास खेल खेल्ने तय छ ।

नेपाली टोलीले एक दिनको अन्तरमा थाइल्यान्डमा रहेका विभिन्न टोलीसँग अभ्यास खेल खेलिहेको छ । टोलीले दैनिक दुई समयमा (बिहान र साँझ) प्रशिक्षण गरिरहेको छ । त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् ।

सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।