काठमाडौं (हाम्रो खेलकुद) – प्रशिक्षणका लागि थाइल्यान्डमा रहेको नेपाली राष्ट्रिय महिला भलिबल टोलीले चौथो अभ्यास खेलमा आज जापानको यु–१८ टिमसँग प्रतिस्पर्धा गर्ने भएको छ ।

खेल बैंककस्थित एसियाकै उत्कृष्ट भलिबल प्रशिक्षण सेन्टर एफआइभिवीमा बिहान १० बजेपछि हुनेछ । नेपालको यो चौथो अभ्यास खेल हो । यसअघिका शुरुवाती दुई खेलमा स्थानिय टिमलाई समान ३–१ को सेटमा पराजित गरेको नेपाली टोलीले गत मंगलबार थाइल्यान्डको यु–२३ टिमसँग ३–० को हार बेहोरेको थियो ।

जापानलाई भलिबलमा निकै सशक्त मानिन्छ । २२ दिने बन्द प्रशिक्षण र अभ्यासमा रहेको नेपाली टोलीले ७ अभ्यास खेल खेल्ने तय छ ।

नेपालले पहिलो अभ्यास खेलमा जरानसानिवोङ युलाई तथा दोस्रो अभ्यास खेलमा बैंकक युनिभर्सिटीलाई समान ३–१ को सेटमा पराजित गरेको थियो ।

बंगलादेशमा आयोजना हुने प्रथम एभीसी एसियन सेन्ट्रल जोन भलिबल च्याम्पयनसिप र स्वदेशमा आयोजना हुने १३औं दक्षिण एसियाली खेलकुद (साग) को थप तयारीका लागि नेपाली टोली २२ दिने प्रशिक्षणमा लागि थाइल्यान्ड गएको हो ।

नेपाली टोलीले एक दिनको अन्तरमा थाइल्यानडा रहेको विभिन्न टोलीसँग अभ्यास खेल खेलिहेको छ । टोलीले दैनिक दुई समयमा (बिहान र साँझ) प्रशिक्षण गरिरहेको छ । त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् ।

सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।