काठमाडौं (हाम्रो खेलकुद) – २०२० मा तुर्केमिनिस्तानमा आयोजना हुने एएफसी फुटसल च्याम्पियनसिपको छनोट चरण खेल्न नेपाली राष्ट्रिय फुटसल टोली आइतबार इरान प्रस्थान गरेको छ ।

छनोट चरणका खेलहरु इरानमा २३ अक्टोवरबाट २५ अक्टोवरसम्म आयोजना हुदैछ ।  नेपाली टोलीको कप्तानी पूर्व राष्ट्रिय फुटबल खेलाडी विजय गुरुङले गर्नेछन् । टोलीलाई अखिल नेपाल फुटबल संघ (एन्फा) ले शुक्रबारै बिदाई गरेको थियो ।

सेन्ट्रल र साउथ जोन अन्तरगत छनोटमा नेपाल ताजिकिस्तान, उज्वेकिस्तान र अफगानिस्तान रहेको समूह ‘ए’ मा रहेको छ ।नेपालले पहिलो खेलमा ताजिकिस्तानसँग अक्टोवर २३ मा खेल्नेछ । २४ अक्टोवरमा उज्वेकिस्तान र २५ अक्टोवरमा समूहको अन्तिम खेलमा अफगानिस्तानसँग खेल्नेछ ।

राउन्ड रोविनपछि ६ वटा समूहका विजेता टोलीले फाइनल चरणमा प्रवेश पाउनेछन् । आयोजक राष्ट्रको हैसियतमा तुर्केमिनिस्तानले सोझै फाइनल चरण खेल्नेछ । एएफसी फुटसल च्याम्पियनसिप २०२० तुर्केमिनिस्तानमा आयोजना हुदैछ ।

फुटसल टोली

१.आदिल हामिद, २.आषिश लामा, ३.अभय राना, ४.अनिश श्रेष्ठ, ५.अरुज सिंह, ६.विजय गुरुङ, ७.विजय श्रेष्ठ, ८.बिनोद गुरुङ, ९.मणि लामा, १०.निर्मल गुरुङ, ११.सन्जोक चाम्लिङ राई, १२.सरोज तामाङ, १३. सुमित आले, १४.सुरज गुरुङ

मुख्य प्रशिक्षक – विष्णु गुरुङ
प्रशिक्षक – गौरव बस्नेत