काठमाडौं (हाम्रो खेलकुद)– चीनका राष्ट्रपति सी चिनफिङको स्वागत र विदाईमा अनिवार्य उपस्थितिका लागि राष्ट्रिय खेलकुद परिषद् (राखेप) ले खेलाडी, खेलकर्मी र पदाधिकारीलाई निर्देशन जारी गरेको छ ।

राखेपका संस्था समन्वय शाखाका प्रमुख ज्ञानेन्द्र श्रेष्ठले शुक्रबार पत्र काट्दै संघका पदाधिकारी, प्रशिक्षक, खेलाडी र रेफ्रीलाई राष्ट्रपति चिनफिङको स्वागत र विदाईमा अनिवार्य उपस्थितिका लागि निर्देशानुसार भन्दै अनुरोध गरेका छन् ।

राष्ट्रपति २ दिने भ्रमणका लागि आज नेपाल आउँदैछन् । राखेपले खेलाडी खेलकर्मीलाई शनिबार दिउँसो ४ बजे र आइतबार बिहान ११ बजे त्रिपुरेश्वरस्थित राखेपमा उपस्थित हुन भनेको छ ।

राखेप सदस्य सचिव रमेशकुमार सिलवालले चीनका राष्ट्रपतिको स्वागतलई भव्य बनाउनका लागि र सद्भाव प्रकटका लागि खेलक्षेत्रका सबैलाई उपस्थितिका लागि निर्देशन दिइएको बताएका छन् ।

‘नेपालको खेलकुद क्षेत्रलाई लामो समयदेखि चीनले सहयोग पनि गर्दै आएको छ,भविष्यमा पनि त्यस्तो सहयोग रहला ‘ उनले भने, ‘२४ वर्षपछि विश्वकै शक्तिशाली राष्ट्रपति आउँदा स्वागत गर्नु हाम्रो पनि जिम्मेवारी जस्तो हो । त्यसै अनुसार हामीले सबैलाई आउन भनेका छौं । ’

सदस्य सचिव सिलवालका अनुसार थापाथलीस्थित ब्लुबर्ड मलदेखि टेकु सम्मको एकतर्फ स्वागत गर्न खेलकुदका लागि ठाँउ छुट्टाइएको जानकारी प्राप्त भएको बताए ।

चीन सरकारको सहयोगमा सन् १९९८ को आठौं दक्षिण एसियाली खेलकुद (साग) का लागि दशरथ रंगशालाको पूर्ननिर्माण र सातदोबाटोस्थित खेलकुद परिषद्को निर्माण भएको थियो ।