काठमाडौं(हाम्रो खेलकुद)-नेपाल ओलम्पिक कमिटी (एनओसी) को आयोजना तथा अन्तर्राष्ट्रिय ओलम्पिक कमिटी (आइओसी) र ओलम्पिक काउन्सिल अफ एसिया (ओसिए) को सहयोगमा ललितपुरमा सुटिङ प्रशिक्षकहरुका लागि ओलम्पिक सोलिडारिटी टेक्निकल कोर्स सुरु भएको छ ।

एनओसी मुख्यालयमा सोमबारबाट सुरु भएको सोलिडारिटी कोर्समा देशका सातै प्रदेशका ३० सुटिङ प्रशिक्षकहरु सहभागि छन् । विज्ञ निर्देशकहरु नर्वेका लिफ रोलान्ड र हंगेरीका सोनाल रामेन्द्रले चार दिनसम्म चल्ने कोर्समा नेपाली प्रशिक्षकहरुलाई राइफल र पिस्तोलका प्राविधिक पक्षहरु सिकाउने छन् ।

कोर्समा सुटिङका प्राविधिक पक्षवारे जानकारी गराइनुका साथै नेपाली प्रशिक्षकहरुलाई खेलमा परिवर्तन भएका नीति तथा नियमहरु पनि सिकाइनेछ । कोर्स २६ सेप्टेम्वरसम्म सञ्चालन हुनेछ । एनओसीका अध्यक्ष जीवनराम श्रेष्ठले सोमबार एक कार्यक्रमबीच कोर्सको उदघाटन गर्दै कोर्सबाट खेलको नवीनतम प्रविधि तथा नियमवारे प्रशिक्षकहरु जानकार रहने विश्वास व्यक्त गरे ।

उदघाटनको अवसरमा नेपाल सुटिङ संघका अध्यक्ष पुस्पदास श्रेष्ठ तथा अन्य पदाधिकारीसँगै एनओसीका उपाध्यक्ष चतुरानन्दराज वैद्य, महासचिव निलेन्द्रराज श्रेष्ठलगायतका पदाधिकारीहरुको उपस्थिति रहेको थियो ।