काठमाडौं(हाम्रो खेलकुद) – प्रथम प्रकाश दाहाल स्मृती युवा नेपाल कप राष्ट्रिय भलिबल प्रतियोगितामा त्रिभुवन आर्मीका धनबहादुर भट्ट सर्वोत्कृष्ट खेलाडी घोषित भएका छन् । 

शनिबार भएको फाइनलमा आर्मी नेपाल पुलिस क्लबसँग ३-० को सोझो सेटमा पराजित भएको थियो । आर्मीले तीनै सेट समान २५-२२ ले गुमाएको थियो । आर्मीलाई फाइनल सम्म पुर्याउन उत्कृष्ट प्रर्दशन गरेका धनबहादुर प्रतियोगिताका सर्वोत्कृष्ट खेलाडी घोषित हुदैं अपाचे बाइक जितेका छन् । अन्य ब्यक्तिगत विधामा नेपाल पुलिस क्लबका खेलाडीको वर्चश्व रह्यो । गण्डकी प्रदेशका याम क्षेत्री उत्कृष्ट ब्लकर बन्दा अन्य सबै विधा पुलिसका खेलाडीले जिते ।

कुल बहादुर थापा उत्कृष्ट स्पाइकर,इम राना उत्कृष्ट सेटर घोषित भए । उत्कृष्ट सर्भरमा द्धारीका थापा,उत्कृष्ट डिफेन्डरमा भिम मगर र उत्कृष्ट प्रशिक्षकमा पुलिसकै सरोज श्रेष्ठ चुनिए । ब्यक्तिग विधामा पुरस्कार जित्ने सबै खेलाडीले रु १० हजार नगद प्राप्त गरे ।

विजेता पुलिसले रु ५ लाख र उप विजेता आर्मीले ३ लाखमा चित्त बुझायो । तेस्रो भएको गण्डकीले १ लाख र चौथो भएको एपीएफले ५० हजार प्राप्त गरे । 

आयोजक प्रगतिशील युवा नेपाल गोरखा काठमाडौंले दोस्रो संस्करणको प्रकाश दाहाल स्मृती युवा नेपाल कप राष्ट्रिय भलिबल प्रतियोगिताको विजेताले ७ लाख पाउने घोषणा समेत गरेको छ । प्रगतिशिल युवा नेपाल गोरखा काठमाडौंले आयोजना गरेको प्रतियोगितामा ८ टोलीको सहभागिता रहेको थियो ।

सोहि अवसरमा नेपाली राष्ट्रिय भलिबल तथा पुलिसका कप्तान इम रानालाई भलिबलमा योगदान पुर्याएकोमा सम्मान गरिएको थियो ।