काठमाडौं (हाम्रो खेलकुद)- त्रिभुवन आर्मी क्लबका पहिलो रोजाईका ओपन स्पाइकर मानबहादुर श्रेष्ठले प्रथम प्रकाश दाहाल स्मृति प्रगतिशिल युवा नेपाल कप’ राष्ट्रिय खुल्ला पुरुष भलिबल प्रतियोगिताको मंगलबार हुने नेपाल पुलिस क्लबविरुद्धको फाइनल खेल गुमाउने भएका छन् ।

सोमबार भएको फाइनल दौरान बाया खुट्टाको एंकलमा चोट बोकेर मैदान बाहिरिएका मानबहादुरले मंगलबार हुने फाइनल खेल गुमाउने पक्का भएको हो । सोमबारको फाइनल खेल वर्षाले स्थगित बनेपछि मंगलबार पुनः शुरुबाटै शुरु हुदैछ । नयाँ बसपार्कस्थित ढोरपाटन स्पोर्टस् क्लबको कोर्टमा दोस्रो सेटमा चलिरहँदा मानबहादुरले विपक्षी खेलाडीको खुट्टामा टेक्न पुगेपछि उनलाई चोट लागेको थियो ।

उनले मंगलबारको फाइनल खेल खेल्न नसक्ने हाम्रो खेलकुदलाई जानकारी गराए । मानबहादुरले भने ‘बाया खुट्टाको एंकलमा चोट छ । भिडियो एक्सरे गराएको छु । रिपोर्ट आउन बाँकी छ । भोलिको फाइनल खेल खेल्न सक्ने छैन ।’

वर्षाको कारण पुलिस र आर्मीबीचको फाइनल खेल स्थगित बनेको छ । पहिलो सेट आर्मीले २५–२३ ले जितेको थियो । दोस्रो सेट पुलिसले २५–२० ले आफ्नो पक्षमा पारेको थियो । तेस्रो सेटमा पुलिसले २१–१९ को अग्रता लिएको थियो ।