काठमाडौं (हाम्रो खेलकुद) –  सर्वाधिक धनराशिको प्रथम प्रकाश दाहाल स्मृति युवा नेपाल कप राष्ट्रिय भलिबल प्रतियोगितामा गण्डकी प्रदेश तेस्रो भएको छ । 

नयाँ बसपार्कस्थित ढोरपाटन स्पोर्टस् क्लबको खेल मैदानमा सोमबार तेस्रो स्थानको लागि भएको खेलमा गण्डकी प्रदेशले एपिएफलाई  ३-२ सेटमा पराजित गर्दै तेस्रो स्थान हात पारेको हो ।  

तेस्रो भएको गण्डकीले १ लाख रूपैयाँ प्राप्त गर्ने छ । एपिएफले पहिलो २६-२४ र दोस्रो सेट २५-२३ ले जितेको थियो । तर सुरुवाती दुई सेट गुमाएको गण्डकीले उत्कृष्ट पुनरागमन गर्दै लगातार तेस्रो र चौथो सेटमा सनसनीपूर्ण जित हात पार्यो । तेस्रो २५-२१ र २५-१९ गण्डकीले जितेपछि खेल थप रोमान्चक बनेको थियो । टोलीले अन्तिम तथा पाँचौ सेट १६-१४ ले जित्दै तेस्रो पक्का गर्यो । 

एपिएफ आइतबार भएको दोस्रो सेमिफाइनमा नेपाल पुलिस क्लबसँग पराजित भएको थियो । त्यस्तै गण्डकी शनिबार भएको पहिलो सेमिफाइनल खेलमा आर्मीसँग पराजित हुँदै उपाधि होडबाट बाहिरिएको थियो । त्यस्तै उपाधिको लागि दुई विभागीय टोली त्रिभुवन आर्मी क्लब र नेपाल पुलिस क्लब भिड्दैछन् ।

गत २४ भदौबाट सुरु भएको प्रतियोगितामा ८ टोलीले सहभािगता थियो। प्रगतिशिल युवा नेपाल गोरखा काठमाडौंले आयोजना गरेको प्रतियोगिताको विजेताले ५ लाख रुपैयाँ हात पार्नेछ । दोस्रो हुनेले ३ लाख, तेस्रोले १ लाख तथा चौथो हुनेले ५० हजार रुपैयाँ हात पार्ने छन् ।