पोखरा (हाम्रो खेलकुद)– पत्रकार सन्देश श्रेष्ठलाई सहारा खेलकुद पत्रकारिता पुरस्कार–२०७५ प्रदान गरिने भएको छ । सहारा क्लब पोखराले खेलकुद विटलाई प्राथमिकता दिएर समाचार सम्प्रेषण गर्ने पत्रकारलाई योगदान आधारमा वर्षेनी पुरस्कार प्रदान गर्दै आएको छ ।

प्रतिभा छनोट समितिले श्रेष्ठलाई पुरस्कार दिन गरेको सिफारिसलाई क्लब अध्यक्ष केशवबहादर थापा अध्यक्षताको बिहीबार बसेको बैठकले अनुमोदन गरेको क्लबद्वारा जारी विज्ञप्तिमा उल्लेख छ । विगत डेढ दशकदेखि पत्रकारितामा क्रियाशील श्रेष्ठ हाल नागरिक दैनिक, रेडियो अन्नपूर्ण र आर्थिक आवाज पत्रिकामा आबद्ध छन् । उनी खेलकुद पत्रकार मञ्च कास्कीका पूर्व उपाध्यक्ष समेत हुन् ।

क्लबको २१औं वार्षिकोत्सव अवसरमा सो पुरस्कार प्रदान गरिने जनाइएको छ । पुरस्कार राशी २० हजार ५ सय ५५ र ताम्रपत्र छ । पुरस्कार राशी यसवर्ष ५ हजार वृद्धि गरिएको क्लब महासचिव विश्वराज बरालले जानकारी दिए । प्रतिभा छनोटका लागि क्लब सल्लाहकार समेत रहेका अग्रज पत्रकार नारायण कार्कीको संयोजकत्वमा समिति गठन गरिएको थियो ।

पत्रकार कुलचन्द्र न्यौपाने, धन बस्नेत, विनोद लामिछाने, राम गुरुङ, प्रेमनारायण न्यौपाने, दीननाथ बराल, प्रदीप पौडेल, एकराज गिरी, सागरराज तिमिल्सिना, कृष्णमणि बराल, एमबी आस्था, सुरज श्रेष्ठ, विजय नेपाल यसअघि सो पुरस्कारबाट सम्मानित भैसकेका छन् ।