काठमाडौं (हाम्रो खेलकुद) – विजय सुनुवार र पञ्चमाया तामाङ राष्ट्रिय लिड च्याम्पियनसिपको च्याम्पियन बनेका छन् । विजय पुरुषतर्फ तथा पञ्चमाया महिलातर्फ च्याम्पियन बनेकी हुन् ।

सातौं पर्वतीय खेलकुद महोत्सवको अवसरमा नेपाल क्लाइम्बिङ्ग स्पोर्टस् एसोसिएसनले शनिबार ठमेलमा रहेको काठमाडौं स्पोर्ट क्लाइम्बिङ सेन्टरमा आयोजना गरेको लिड च्याम्पियनसिपमा पुरुषतर्फ तेन्जिङ राई दोस्रो तथा प्रनिल श्रेष्ठ तेस्रो भए । महिलातर्फ स्वस्तिका चौधरी दोस्रो तथा रुस प्रधानले तेस्रो स्थान हात पारिन् ।

च्याम्पियनसिपमा दुई विभागीय टोलीबाट नेशनल लिड च्याम्पियनसीपमा ११ जना महिला र ३१ जना पुरुष गरी कुल ४२ जना खेलाडीहरुले प्रतिस्पर्धा गरेका थिए । जसमा नेपाली सेना र नेपाल स्काउटको चारुमति ओपन ट्रप र क्रु रहेका थिए ।

पुरुष र महिला दुवैतर्फको शीर्ष तीन स्थान हासिल गर्ने टोलीले क्रमशः २० हजार, १५ हजार र १० हजार रुपैया हात पारे । विजयी खेलाडीलाई राखेपका उपाध्यक्ष तथा नेपाल ओलम्पिक कमिटिको सह–महासचिवमा निर्विरोध निर्वाचित पिताम्वर तिम्सिनाले पुरस्कृत गरे । त्यसअघि प्रतियोगिताको उद्घाटन नेपाल ओलम्पिक कमिटिका अध्यक्ष तथा सांसद जीवनराम श्रेष्ठले गरेका थिए ।

स्पोर्ट क्लाइम्बिङ्ग खेलका मुख्य तिन विधाहरु लिड क्लाइम्बिङ, बोल्डरिङ र र स्पिड क्लाइम्बिङ हुने भएपनि संघले लिड च्याम्पियनसिप मात्रै आयोजना गरेको हो । विजयी खेलाडीहरुले ६ महिनाभित्र हुने कुनै पनि अन्तराष्ट्रिय प्रतियोगितामा भाग लिने अवसर दिईने संघले जनाएको छ ।