काठमाडौं (हाम्रो खेलकुद) – घरेलु भलिबलमा सर्वाधिक धनराशी पुरस्कार रहेको तथा स्वर्गीय प्रकाश दाहालको स्मृतिमा आयोजना हुने ‘प्रथम प्रकाश दाहाल स्मृति प्रगतिशिल युवा नेपाल कप’ राष्ट्रिय खुल्ला पुरुष भलिबल प्रतियोगितामा १० भन्दा बढी टोलीको सहभागिता रहने भएको छ ।

आयोजक प्रगतिशिल युवा नेपालले बुधबार राजधानीमा पत्रकार सम्मेलनको आयोजना गर्दै २४ देखि २८ भदौसम्म हुने सर्वाधिक धनराशिको भलिबल प्रतियोगितामा १० भन्दा बढी टोलीको सहभागिता हुने जानकारी गराएको हो ।

‘ हामीसँग अब तयारी अवधि छोटो छ । अहिलेसम्म १३ टोलीले सहभागिताको लागि मौखिक निर्णय दिएका छन् । समय अझै बाँकी रहेकाले टोली अझै बढ्न सक्नेछ,’ प्रतियोगिताका संयोजक तथा एसिया इन्टरनेशनल रेफ्री क्यान्डिडेट विकास गुरुङले भने, ‘रोक्नै नसकिने अवस्थामा हामी १२ टोलीसम्म खेलाउनेछौं । बढी टोली भए समयाअवधि पनि बढाइनेछ । यसबारै अर्काे पत्रकार सम्मेलनमा जानकारी हुनेछ ।’

प्रतियोगितामा तीन विभागीय टोलीको सहभागिता पक्का रहेको र १३औं सागको प्रशिक्षणमा रहेका राष्ट्रिय खेलाडीलाई फुकुवा गरिदिन नेपाल भलिबल संघलाई जानकारी गराइसकेको संयोजक गुरुङले बताए । सामाजिक कार्यसँगै खेलकुदमा कार्य गर्ने गरी भर्खरै स्थापित भएको प्रगतिशल युवा नेपाल अध्यक्ष दीपक थापाले खेलाडीमा नयाँ उर्जा थप्न राष्ट्रिय खुल्ला भलिबल प्रतियोगिता आयोजना गर्न लागिएको बताए । अध्यक्ष थापाले खेलकुद विकास र समृद्धिको पूर्वाधार रहेपनि उल्लेख्य फड्को मार्न नसकिरहेको अवस्थामा प्रगतिशील युवा नेपाल खेलकुदमा नयाँ उर्जाका साथ जोडिएको बताए ।

नयाँ बसपार्कस्थित ढोरपाटन क्लबको खेल मैदानमा हुने प्रतियोगिताको विजेताले ५ लाख रुपैयाँ हात पार्नेछ । जुन पुरुष भलिबलमा सर्वाधिक धनराशी हो । दोस्रो हुनेले ३ लाख, तेस्रोले १ लाख तथा चौथो हुनेले ५० हजार रुपैयाँ हात पार्नेछ । प्रतियोगिताको सर्वाेत्कृष्ट खेलाडीले एक थान मोटरसाइकल हात पार्नेछन् । स्पाइकर, ब्लकर, डिफेन्डर, सर्भर र प्रशिक्षकले जनही १०–१० हजार रुपैयाँ प्राप्त गर्ने महासचिव सुनिल थापा मगरले जानकारी गराए ।

प्रतियोगितामा तीन विभागीयसहित १० टोलीको सहभागिता पक्का रहेको प्रतियोगिता संयोजक विकास गुरुङले जानकारी गराए । एक टोलीले ३ विदेशी खेलाडी क्लबमा राख्न पाउने र तीनै जनाले एकैपटक कोर्टमा उत्रन पाउनेछन् । प्रतियोगिताको अनुमानित खर्च करिब ३८ लाख ५० हजार रुपैयाँ रहने आयोजकको अनुमान छ ।प्रतियोगिताको उद्घाटन पुर्व प्रधानमन्त्री तथा नेकपाका अध्यक्ष पुष्पकमल दाहालले गर्ने तय भएको प्रतियोगिता संयोजक गुरुङले बताए ।