काठमाडौं (हाम्रो खेलकुद)– पाँचौं एभिसी एसियन सेन्ट्रल जोन पुरुष भलिबल च्याम्पियनसिपमा दक्षिण एसियाली राष्ट्र पदकविहिन भएका छन् । ७ राष्ट्रको सहभागिता रहेको च्याम्पियनसिपमा दक्षिण एसियाका सहभागी ३ राष्ट्रमध्ये माल्दिभ्स चौथो र नेपाल पाँचौं र बंगालदेश सातौं भएको छ ।

तुर्केमिनिस्तानसँग शुक्रबार तेस्रो स्थानका लागि भएको खेल माल्दिभ्सले ३–० को सोझो सेटमा गुमाएपछि दक्षिण एसियाली राष्ट्र पदकविहिन बनेका हुन् । तुर्केमिनिस्तानले बंगादेशलाई २५–१९,२५–२० र २५–१९ ले हराएको थियो । नेपाल र बंगलादेशको भने यसअघि नै पदकको सम्भावना समाप्त भएको थियो । समूह चरणका सबै तीन खेल गुमाएको बंगलादेश च्याम्पियनसिपको पुछारमा रहेको थियो ।

शुक्रबार अफगानिस्तानलाई हराउँदै नेपाल पाँचौं भएको थियो । लगानखेल स्थित नेपाली सेनाको कभर्ड हलमा भएको खेलमा अफगानिस्तानलाई २५–२३,२३–२५,२५–१८,२६–२४ ले हराउँदै नेपालले पाँचौं स्थान पक्का गरेको हो । समूह चरणमा बंगलादेशलाई मात्र हराउन सफल भएको अफगानिस्तान च्याम्पियनसपको छैटौं बनेको छ ।

च्याम्प्यिनसिपअघि यी दुई टोलीबीच भएको दुई वटा मैत्रीमा नेपाले समान ३–२ को जित हासिल गरेको थियो । समूह चरणमा भने नेपालले दुवै खेल गुमाएको थियो । पहिलो खेलमा कीर्गिस्तानसँग पराजित भएको नेपालले माल्दिभ्ससँगको खेल पनि समान ३–० ले गुमाएको थियो ।

माल्दिभ्स सेमिफाइनलमा उज्वेकिस्तानसँग पराजित भएको थियो । कीर्तिस्तानले भने सेमिफाइनलमा तुर्केमिनिस्तानलाई हराएको थियो । कीर्तिस्तान र उज्वेकिस्तानबीच शनिबार च्याम्पियनसिपको फाइनल हुनेछ ।