काठमाडौं (हाम्रो खेलकुद)– घरेलु कोर्ट एभिसी एसियन सेन्ट्रल जोन भलिबल च्याम्पियनसिपमा आयोजना हुँदा त्रिभुवन आर्मी क्लबका खेलाडी मानबहादुर श्रेष्ठ नेपाली टोलीमा थिएनन् । उनी च्याम्पियनसिपमा दर्शकमा सिमित थिए ।

तर, सबैभन्दा चर्चा र खोजी उनकै भयो भन्दा फरक पर्दैन । चाहे त्यो च्याम्पियनसिपको प्रत्यक्ष प्रसारणमा आउने कमेन्ट होस् वा च्याम्पियनसिपमा नेपालको खेल चलिरहँदा मानकै बढी चर्चा भयो । च्याम्पियनसिपमा समूह चरणमा माल्दिभ्सविरुद्धको खेलमा त उनको नाममा दर्शकहरुले नाराबाजी जस्तै गरे ।

यता नेपाली टोली माल्दिभ्सविरुद्ध दबाबमा परेका बेला दर्शकदिर्घामा रहेका मानबहादुर पनि जोसमा उठे । दर्शकको नजरमा उनमा पर्यो र उनका पक्षमा नारा लगाउन थाले । नेपालले माल्दिभ्ससँगका खेल जोगाउन सकेन । ३–० ले गुमायो । नेपाल २५–२२, २५–२१ र २५–१४ ले पराजित भएको थियो । पहिलो खेलमा कीर्गिस्तानसँग हारिसकेको नेपाल समूह चरणबाट बाहिरयो, माल्दिभ्स अघि बढ्यो ।

दर्शकले मानबहादुरलाई जति मिस गरे, राष्ट्रिय टोलीलाई उनले सायद त्यो भन्दा बढी मिस गरे । उनले हाम्रो खेलकुदसँग भनेका थिए, ‘निकै मिस हुँदो रहेछ । बाहिर बसेर हेर्न गाह्रो हुदो रहेछ । यसमा मेरो आफ्नै गल्ति छ ।’

उनी राष्ट्रिय टोलीमा पर्ने खेलाडीका दाबेदार हुन् । उनको खेलको धेरैले प्रशंसा पनि गर्छन् । तर, एउटा घटनाले उनी टोलीमा समेटिएनन् । वैशाखमा प्रदेश ५ मा भएको आठौं राष्ट्रिय खेलकुदलाई राष्ट्रिय टोलीको छनोटको आधार मानिएको थियो । त्यसको केहि दिन अघि मानबहादुर स्थानीय समाजको अनौपचारिक भलिबल खेल्न जापान उडे । उनी आठौं खेल्नुपर्छ भन्नेमा थिए ।

त्यसैले त्यहाँको प्रतियोगिता सकेर फर्किहाले । आर्मीका केहि खेल सकिसकेको थियो । उनी नेपालगन्ज पुग्ने उद्देश्यका साथ स्वदेश फर्के । तर उनलाई आर्मीले आठौं खेल्ने टोलीमा समावेश गरेको थिएन । खेल भन्दा कुनै खेलाडी ठूलो हुन्न भन्ने मानले पनि त्यति बेला मात्र थाहा पाए । आठौंको प्रदर्शनका आधारमा २५ खेलाडी छनोट हुँदा मान त्यसमा अटेनन् ।

उनले त्यसमै आफ्नो गल्ति भएको स्वीकार गरेर नै होला । उनी बीच भलिबल खेल्न पोखरा गए । जहाँ उनको जोडी च्याम्पियन पनि बन्यो । नेपाल भलिबल संघले भलिबल टोलीमा नहुनेले बीच खेल्न पाउने निर्णय सुनाएपछि मान त्यसतर्फ लागे । अब उनी बीच भलिबलबाट नेपालको प्रतिनिधित्व गर्ने तयारीमा छन् ।

घरेलु कोर्टमा च्याम्पियनसिप भइराख्दा उनको माग त बढेको देखियो । तर, टोलीका कप्तान इम राना मगर भने मानको अभाव मान्न तयार छैनन् । मान आफ्नै गल्तीका कारण टोलीमा नसमेटिएको बताउँदै इमले उनको प्रदर्शन पहिले जस्तो टोलीको लागि अत्यावश्यक नरहेको समेत बताए ।

‘मान आफ्नै गल्तीले टोलीमा नपरेको हो । राष्ट्रिय टोलीका लागि छनोट नै नखेली दुई पैसाका लागि जापान जानु उसकै गल्ति हो’ , माल्दिभ्सको खेलपछि कप्तान इमले भने, ‘अहिले उनको स्तर पहिले जस्तो छैन । उनले भर्खरै सम्पन्न प्रधानसेनापति भलिबलमा पनि बेन्चमा रहेर खेलेका थिए । उनको ठाँउमा राजेन्द्र विष्टले राम्रो खेलेका थिए । उनी यसअघि राम्रो खेलाडी भएपनि अहिले टोलीका लागि नभई नहुने खेलाडी होइनन् । उनी नहुँदा टोलीको हार भएको म मान्दिन ।’