काठमाडौं (हाम्रो खेलकुद)– नेपाल भलिबल संघ संयुक्त अरब इमिरेट्स (यूएई) सम्पर्क समितिले सोमबार सुरु भएको एभिसी एसियन सेन्ट्रल जोन सिमियर मेन्स भलिबल च्याम्पियनसिपमा आर्थिक सहयोग गरेको छ ।

समितिका संयोजक एवंम् पूर्व भलिबल खेलाडी इश्वर घमाल र अन्य पूर्व खेलाडीहरुले १ लाख रुपैयाँ संकलन गरि च्याम्पियनसिपका लागि पठाएका छन् ।

घमालकी श्रीमती लक्ष्मी घमालले सोमबार च्याम्पियनसिपको पहिलो दिन नेपाल भलिबल संघका महासचिव जितेन्द्रबहादुर चन्दलाई हस्तान्तरण गरेकी थिइन् ।

नेपालसहित ७ राष्ट्रको सहभागिता रहेको च्याम्पियनसिपका लागि २ करोड रुपैयाँ भन्दा बढी खर्च हुने संघले जनाएको छ । च्याम्पियनसिपलाई राष्ट्रिय खेलकुद परिषद, नेपाल ओलम्पिक कमिटि, नेपाल उद्योग वाणिजय महासंघ, नेपाल सेटलाईट टेलिकम प्रालि, काठमाडौं महानगरपालिका, ललितपुर महानगरपालिका, गोल्डस्टार जुत्ता , सेन्चुरी बैंक र श्रेष्ठ टेलरिङ सेन्टरले सहयोग गरेका छन् ।

त्यस्तै भलिबल संघका सल्लाहकार तथा पूर्व महासचिव जय नारायण चौधरीले च्याम्पियनसिपका लागि भलिबलका विभिन्न खेल सामग्री सहयोग गरेका थिए । चौधरीले जापानिज सिन्हो कम्पनीबाट करिव ११ लाख रुपैया बराबरको भलिबल खेल सामग्री खरिद गरी पठाएका थिए । जसमा एफआइभीभीबाट मान्यता प्राप्त १ सेट पोल, १ थान नेट, १ जोडी एन्टेना र १ सेट पोस्ट कभर छन् । यी सामान अहिले च्याम्पियनसिपमा प्रयोग भइरहेको छ ।