काठमाडौं (हाम्रो खेलकुद)– घरेलु मैदानमा पहिलो पटक आयोजना भएको एभीसी एसियन सेन्ट्रल जोन सिमियर मेन्स भलिबल प्रतियोगिताको सुरुवात हारबाट गरेपछि अब नेपाली टोलीसँग धेरै विकल्प छैन ।

समूह एमा माल्दिभ्सविरुद्ध बुधबार हुने खेल हारेको खण्डमा नेपाल समूह चरणबाटै बाहिरिनेछ । त्यसअर्थमा नेपालका लागि त्यो खेल गर वा मरको अवस्थामा हुनेछ । नेपाललाई ३–० को सोझो सेटमा हराउँदै एक पटकको च्याम्पियन कीर्गिस्तानले च्याम्पियनसिपमा विजयी सुरुवात गरेको छ ।

समूह एमा माल्दिभ्स र कीर्गिस्तानबीचको खेलको नतिजाले नेपालको अघिल्लो चरणको यात्रालाई प्रभाव पार्न सक्नेछ । मंगलबार माल्दिभ्सलाई हराउन सके कीर्गिस्तान लगातार दुई खेल जित्दै सेमिफाइनल पुग्नेछ । यदि माल्दिभ्स जितेको खण्डमा भने नेपाल र मादिभ्सबीच हुने समूहको अन्तिम खेल सम्म कुर्नुपर्ने हुन्छ । समूहका शीर्ष दुई टोली सेमिफाइनल पुग्नेछन् ।

लगनखेस्थित नेपाली सेनाको कभर्डहलमा सोमबार घरेलु कोर्टमा झन्डै ३ हजार दर्शकबीचमा नेपालले पहिलो सेटमा किर्गिस्तानलाई कडा चुनौती दिएपनि २३–२५ ले सेट गुमाएको थियो । दोस्रो र तेस्रो सेटमा उत्तिकै चुनौती दिएपनि नेपालले खेल आफ्नो पक्षमा पार्न सकेन । दोस्रो सेट २२–२५ र तेस्रो सेट पनि २२–२५ ले नै गुमायो ।

हारपछि नेपाली टोलीका मुख्य प्रशिक्षक हान एबिङले किर्गिस्तानलाई बधाई दिदै नेपाली टोलीले सोचेअनुरुप प्रदर्शन गरेको र हारमा दुख मान्नुपर्ने कारण नरहेको बताए । ‘किर्गिस्तानलाई बधाई छ । बलियो किर्गिस्तानले खेललाई आफ्नो नियन्त्रणमा लिन सफल भयो । मेरो टोलीको प्रदर्शनबाट सन्तुष्ट छु, नेदरल्यान्डका प्रशिक्षक एबिङले खेलपछि भने,‘ खेलाडीले अफगानिस्तानसँग भन्दा राम्रो खेले । किर्गिस्तान सबै पक्षमा राम्रो रहँदा हामीले अंक लिन सकेनौ ।’

उनले किर्गिस्तानसँगको खेलको कमजोरी केलाउदै माल्दिभ्सविरुद्ध जितका लागि खेल्ने बताए । किर्गिस्तानका प्रशिक्षक एन्डेरी अन्कुडिनोभले नेपालको खेलको प्रसंशा गर्दै नेपालमा भलिबलको उच्च सम्भावना रहेको बताए । उनले नेपाली टोलीमा युरोपियन प्रशिक्षक रहेको र खेलाडीमा खेल भावना रहेको समेत बताए ।

सोमबार नै भएको अन्य खेलमा तुर्केमिनिस्तान र उज्वेकिस्तानले पाँचौं सस्करणको एभीसी एसियन सेन्ट्रल जोन सिनियर पुरुष भलिबल च्याम्पियनसिपमा विजयी सुरुवात गरेको छ । पहिलो खेलमा तुर्केमनिस्तानले अफगानिस्तानलाई ३–१ को सेटमा पराजित गर्दै विजयी सुरुवात गरेको हो ।

निकै नै प्रतिस्पर्धात्मक बनेको खेलको पहिलो सेटमा तुर्केमिनिस्तान ३२–३० ले विजयी हुन सफल भएको थियो । दोस्रो सेटमा अफगानिस्तान २५–१६ ले विजयी हुदै खेलमा फर्किएको थियो । तर, त्यसपछिको दुवै सेट तुर्केमिनिस्तानले २७–२५ र २६–२४ को सेटमा जित निकालेको थियो । अब तुर्केमिनिस्तानले मंगलबार उज्वेकिस्तानको सामना गर्नेछ । अफगानिस्तानले बंगलादेशसँग खेल्नेछ ।

उज्वेकिस्तानले बंगलादेशमाथि ३–० को सहज जित निकाल्यो । आइतबार मात्र नेपाल आइपुगेको उज्वेकिस्तानले समूह ‘बी’ मा दक्षिण एसियाली राष्ट्र बंगलादेशलाई २५–१६, २५–१६ र २५–२३ ले हराएको थियो ।

च्याम्पियनसिपमा मंगलबार समूह ‘बी’ को अफगानिस्तान र बंगलादेश दिउसो ३ बजे तथा तुर्केमिनिस्तान र उज्वेकिस्तानबीच साँझ ५ बजे खेल हुनेछ । समूह ‘ए’ मा किर्गिस्तान र माल्दिभ्सबीच साँझ ७ बजे खेल हुनेछ । च्याम्पियनसिपमा नेपालसहित दुईपटकको विजेता तुर्कमेनिस्तान, किर्गिस्तान, उज्वेकिस्तान, बंगलादेश, अफगानिस्तान र माल्दिभ्स सहभागी छन् ।

आज भएका खेलको हाइलाइटस: