उपाधि दाबेदार तुर्केमिनिस्तानको विजयी सुरुवात

काठमाडौं (हाम्रो खेलकुद) – उपाधि दावेदार तुर्केमिनिस्तानले ललितपुरमा आजबाट शुरु भएको पाँचौं संस्करणको एभीसी एसियन सेन्ट्रल जोन सिनियर पुरुष भलिबल च्याम्पियनसिपमा विजयी सुरुवात गरेको छ ।

लगनखेलस्थित नेपाली सेनाको सैनिक शारीरिक तथा खेलकुद बिकास केन्द्रमा भएको पहिलो खेलमा तुर्केमिनिस्तानले अफगानिस्तानलाई ३–१ को सेटमा पराजित गर्दै विजयी सुरुवात गरेको हो ।

निकै नै प्रतिस्पर्धात्मक बनेको खेलको पहिलो सेटमा तुर्केमिनिस्तान ३२–३० ले विजयी हुन सफल भएको थियो । दोस्रो सेटमा अफगानिस्तान २५–१६ ले विजयी हुदै खेलमा फर्किएको थियो । तर, त्यसपछिको दुवै सेट तुर्केमिनिस्तानले २७–२५ र २६–२४ को सेटमा जित निकालेको थियो ।