काठमाडौं (हाम्रो खेलकुद) – नेपाली भलिबलको इतिहासमै पहिलो पटक आयोजना हुन लागेको पाँचौ संस्करणको एभीसी एसियन सिनियर पुरुष भलिबल च्याम्पियनसिप आउन अब एक दिन मात्रै बाँकी छ ।

च्याम्पियनसिपमा सहभागिता जनाउन सबै टोली नेपाल आइसकेका छन् ।अन्तिम टोलीका रुपमा उज्वेकिस्तान आइतबार बिहान नेपाल आइपुगेको छ ।

समूह ‘ए’ मा रहेको नेपालले सोमबार बलियो टोली किर्गिस्तानसँग खेल्दै च्याम्पियनसिपको शुरुवात गर्नेछ । खेल ४ बजेपछि लगनखेलस्थित नेपाली सेनाको सैनिक शारीरिक तथा खेलकुद बिकास केन्द्रमा हुनेछ ।

एक खेल जितेपनि सेमिफाइनलको बलियो सम्भावना रहेको नेपाल किर्गिस्तानलाई पराजित गर्दै सेमिफाइनलको यात्रालाई सहज बनाउने छ । त्यसपछि नेपालले बुधबार माल्दिभ्ससँग खेल्नेछ ।
बलियो किर्गिस्तानसँग नेपालको इतिहास निकै खराव छ । पछिल्ला ६ भेटमा नेपाल ४ खेलमा पराजित भएको छ ।

पहिलो संस्करणमा नेपालले किर्गिस्तानलाई ३–१ ले पराजित गरेको थियो । त्यसयता नेपाल किर्गिस्तानसँग पराजित हुदै आइरहेको छ ।

गतवर्ष इन्डोनेसियाको जाकर्तामा भएको एसियाडमा १५औं वरीयताको लागि हुने खेलमा किर्गिस्तान अनुपस्थित रहेपछि आयोजकले नेपाललाई ३–० ले विजेता घोषणा गरेको थियो । त्यसैलाई नेपालको जित मानिएको छ।

तर, सेन्ट्रल जोनका सबै चार भेटमा नेपाल पराजित भएको छ । २०७३ मा नेपालले समूह चरण र सेमिफाइनलमा १ सेटमा जित निकाल्नु नै नेपालको बहादुरी हो ।

‘हेड टु हेड’
पहिलो सेन्ट्रल जोन ३–१ को सेटमा जित
दोस्रो सेन्ट्रल जोन २०७३ सेमिफाइनल ३–१ को सेटमा पराजित
(१८–२५, १२–२५, २६–२४ र १०–२५)

तेस्रो सेन्ट्रल जोन २०७३ समूह चरण ३–१ को सेटमा पराजित
(२५–२०, १३–२५, १५–२५ र ११–२५)
तेस्रो सेन्ट्रल जोन २०७४ प्ले अफ ३–० को सेटमा पराजित
१६–२५, २३–२५ र २०–२५
चौथो सेन्ट्रल जोन २०७५ तेस्रो स्थान ३–० को सेटमा पराजित
(२०–२५, २२–२५ र २०–२५)
एसियन गेम्स २०७५ वाक ओभरमा जित
(२५–०, २५–० र २५–०)