काठमाडौं (हाम्रो खेलकुद) – अखिल नेपाल फुटबल संघ (एन्फा) अन्तरगतको फुटसल कमिटिले राष्ट्रिय फुटसल टोलीका लागि प्रारम्भिक चरणमा ३० खेलाडीलाई छनोट गरेको छ ।

भाटभटेनी हेल्थ क्लब चुच्चेपाटीमा ५ दिनसम्म भएको ओपन ट्रायलबाट ३० खेलाडी छनोट गरिएको एन्फाका केन्द्रिय सदस्य तथा फुटसल कमिटिका संयोजक दावा लामाले जानकारी गराए । ट्रायल २७ साउनबाट ३१ साउनसम्म भएको थियो । ट्रायलमा प्रशिक्षकहरु चक्र तामाङ, विनोद लामा, चेतन घिमिरे, गौरव बस्नेत र सरोज थापाले सघाएका थिए ।

एन्फा र फुटसल कमिटिले ताजिकिस्तानमा अक्टोबरमा हुने एएफसी फुटसल च्याम्पियनसिपको छनोटका लागि राष्ट्रिय टोलीका लागि ओपन ट्रायल लिएको हो ।

छनोट भएका खेलाडीहरुको ५ भदौबाट बन्द प्रशिक्षण शुरु हुने संयोजक लामाले बताए । बन्द प्रशिक्षण दौरान नै खेलाडीहरुको फिजिकिल फिटनेससँगै स्किल टेस्ट हुने छ । २० भदौसम्ममा १४ सदस्यीय टोलीको अन्तिम छनोट गरिनेछ ।

त्यसरी तयार हुने टोलीले अर्काे वर्ष इरानमा हुने एएफसी फुटसल च्याम्पियनसिपको छनोट खेल खेल्नेछ । छनोट खेल ताजिकिस्तानमा अक्टोवरमा हुनेछ । सेन्ट्रल र साउथ जोन अन्तरगत छनोटमा नेपाल ताजिकिस्तान, उज्वेकिस्तान र अफगानिस्तान रहेको समूह ‘ए’ मा रहेको छ ।

नेपालले पहिलो खेलमा ताजिकिस्तानसँग अक्टोवर २३ मा खेल्नेछ । २४ अक्टोवरमा उज्वेकिस्तान र २५ अक्टोवरमा समूहको अन्तिम खेलमा अफगानिस्तानसँग खेल्नेछ ।

राउन्ड रोविनपछि ६ वटा समूहका विजेता टोलीले फाइनल चरणमा प्रवेश पाउनेछन् । आयोजक राष्ट्रको हैसियतमा तुर्केनिस्तानले सोझै फाइनल चरण खेल्नेछ ।