काठमाडौं (हाम्रो खेलकुद) – एभीसी एसियन सेन्ट्रल जोन सिनियर पुरुष भलिबल च्याम्पियनसिपको लागि माल्दिभ्स भलिबल टोली शुक्रबार नेपाल आइपुगेका छन्।

माल्दिभ्स भलिबल टोली शुक्रबार बिहान १० बजे त्रिभुवन अन्तर्राष्ट्रिय विमानस्थलमा ओर्लिएको हो । टोलीलाई स्वागत गर्न नेपाल भलिबल संघका उपाध्यक्ष निरोज मास्केलगायतका पदाधिकारीहरु विमानस्थल पुगेका थिए । आजै अन्य तीन टोली पनि नेपाल आइपुग्ने नेपाल भलिबल संघले जनाएको छ ।

बंगलादेश, किर्गिस्तान र तुर्किमिनिस्तान आजै तथा उज्वेकिस्तान भने आइतबार आईपुग्ने संघले जनाएको छ ।

च्याम्पियनसिपको लागि अफगानिस्तानको टोली मंगलबार आइपुगेको थियो । प्रतियोगितामा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।

च्याम्पियनसिप लगनखेलस्थित सैनिक शारीरिक तालिम तथा खेलकुद केन्द्रमा भदौ २ देखि भदौ ७ गतेसम्म संचालन हुनेछ । खेलको हाम्रो खेलकुद डटकमले प्रत्यक्ष प्रसारण गर्नेछ ।

भलिबल टोली नेपाल आइपुग्ने तालिका
टिमः– बंगलादेश समय मध्यान्ह ११ः५५ बजे, होटल क्राउन प्लाजा नागपोखरी
टिमः– किर्गिस्तान समय राति १२ः१० बजे, होटल मुनलाईट
टिमः– तुर्केमिनिस्तान समय राति १२ः१० बजे, होटल मुनलाईट
आइतबार उज्वेकिस्तान समय बिहान ९ः३० बजे, होटल मुनलाईट