काठमाडौं (हाम्रो खेलकुद) – चेसका खेलाडी पनि अनुबन्धित भएका छन् । रुकुम चेस क्लबले तुलसी स्मृती प्रतिष्ठानद्वारा आयोजना गर्न लागिएको राष्ट्रिय टिम च्याम्पियनसिपका लागि पाँच खेलाडीलाई आफ्नो क्लबमा अनुबन्ध गरेको छ ।

क्लब संग अनुबन्धित हुने खेलाडीमा मिलन लामा, सुस्रुत दाहाल, विवेक श्रेष्ठ, युवराज पौडेल र मिलन रोक्का छन् । खेलाडीलाई क्लबका संयोजक तथा अन्तराष्ट्रिय आर्विटर एवं राष्ट्रिय ईन्ष्ट्रक्टर बालाराम पुनले आइतबार अनुबन्ध पत्र हस्तान्तरण गरे ।

चेस खेलमा उत्कृष्ट, अनुशासित तथा शिक्षित खेलाडीका रुपमा गनिएका खेलाडी मध्येका मिलन अन्तराष्ट्रिय रेटिङमा २०३४ मा रहेका छन् । उनी यु – १० का च्याम्पियन रहनुका साथै सहकारी चेस च्याम्पियनका उपविजेता समेत हुन् । हालै पूर्वमा भएको पथरी ओपन विजेता रहेका सुस्रुत दाहाल १८१९ रेटिङ्गमा छन् ।

गत साल भएको टिम च्याम्पियनमा सनसनीपूर्ण खेल प्रस्तुत गरेका विवेक १८४४ रेटिङका हुन् । यु – १६ उपविजेता भई २०१७ का ओलम्पियाडमा सहभागी भईसकेका युवराज १६६३ रेटिङ तथा मध्यपश्चिमका विजेता भईसकेका रुकुमका पहिलो खेलाडीमा गनिएका मिलन रोक्का १७६६ रेटिङमा छन् । संयोजक पुनले अनुशासित तथा उच्च स्तरका खेलाडीलाई क्लबमा अनुबन्ध गर्न पाउँदा खुसी लागेको बताए ।