काठमाडौं (हाम्रो खेलकुद)– त्रिभुवन आर्मी क्लबका चार खेलाडी सुकीर्ति पदकबाट सम्मानित भएका छन् । गणतन्त्र दिवसका अवसरमा राष्ट्रपति विद्यादेवी भण्डारीले घोषणा गरेको सुकीर्ति पदक प्राप्त गर्नेमा आर्मीका भलिबल खेलाडीद्वय मानबहादुर श्रेष्ठ र भैरव बम तथा एथलेटिक्सका विश्वरुपमा बुढा र सोमबहादुर कुमाल रहेका छन् ।

नेपाली सेनाका प्रधानसेनापति पूर्णचन्द्र थापाले भद्रकालीस्थित सेनाको मुख्यालयमा आयोजित कार्यक्रमा चार खेलाडीलाई पदक प्रदान गरेका थिए ।

सरकारबाट पदक प्राप्त गरेपछि भलिबलमा अझै राम्रो हौसला मिलेको मानबहादुरले बताए । यद्दपी उनी अहिले एभिसी सेन्ट्रल जोन भलिबल च्याम्पियनसिप र १३ औं दक्षिण एसियाली खेलकुद (साग) को टोलीमा भने छैनन् ।

वैशाखमा सम्पन्न आठौं राष्ट्रिय खेलकुद नखेलेका कारण उनी राष्ट्रिय टोलीको प्रशिक्षणमा पर्न सकेनन् । आठौं सुरु हुनु केहि दिन अघि उनी भलिबल खेल्नकै लागि जापान भएका थिए । आठौंका केहि खेल बाँकी रहँदा उनी स्वदेश फर्केपनि सेनाले उनलाई आठौं खेल्न दिएन । जसका कारण उनी अहिले पुरुष टोलीमा समेटिएनन् ।

उनले गत महिना पोखरामा सम्पन्न बीच भलिबलमा भाग लिएका थिए । दील सुनार उनको उनको जोडी विजयी भएको थियो । यो वर्ष मानबहादुरले बीच भलिबलमात्र खेल्ने सम्भावना रहेको बताए ।