काठमाडौं (हाम्रो खेलकुद) – नेपालको खेलकुद इतिहासमा पहिलो पटक खेलाडीहरुको वर्गीकरण गरिने भएको छ । खेलाडी आउने दिनमा खेलाडी राष्ट्रिय वा अन्तर्राष्ट्रिय खेलाडीका रुपमा वर्गीकृत हुनेछन् । संसदिय समितिले संसोधन गरेको राष्ट्रिय खेलकुद विधेकलाई राष्ट्रिय सभाले बिहीबार पास गरेको छ । मुख्यतः खेलाडीहरुलाई दुई वर्गमा विभाजन गरिने भएको छ ।

अन्तर्राष्ट्रिय खेलाडी तिनलाई भनिनेछ जसले औपचारिक अन्तर्राष्ट्रिय प्रतियोगितामा पदक जितेका छन् । अन्तर्राष्ट्रिय स्तरको औपचारिक प्रतियोगितामा सहभागी भएकै कारण अन्तर्राष्ट्रिय खेलाडीको परिचय भने पाउने छैनन् । यस्तै मैत्रीपूर्ण र अन्तर्राष्ट्रिय मान्यता प्राप्त नभएका प्रतियोगितामा पदक जित्नेले पनि अन्तर्राष्ट्रिय खेलाडीको स्थान पाउने छैनन् ।

राष्ट्रिय खेलाडी तिनलाई भनिनेछ जसले राष्ट्रिय खेलकुद परिषदले आयोजना गरेको औपचारिक राष्ट्रिय प्रतियोगितामा पदक जितेको र अन्तर्राष्ट्रिय स्तरको औपचारिक खेलमा नेपालको प्रतिनिधित्व गरेका छन् । राष्ट्रिय सभाले उक्त विधेकलाई पास गर्न संघिय संसदमा पठाएको छ । विधेयकमा राष्ट्रिय प्रतियोगितामा भाग लिएका तर कुनै पनि पदक नजितेकालाई खेलाडी मात्र भनिने उल्लेख गरिएको छ ।

वर्गीकरण नहुँदा खेल क्षेत्रमा खेलाडीका विषयमा पनि दुविधा रहेको राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले बताए । ‘राष्ट्रिय की अन्तर्राष्ट्रिय खेलाडी भन्ने विषयमा खेलाडीहरुमै विवाद छ,’ अध्यक्ष श्रेष्ठले भने, ‘खेलाडी, राष्ट्रिय वा अन्तर्राष्ट्रिय खेलाडी अब यो वर्गीकरणले सहज हुने भयो ।’

विगतमा राखेपले जारी गरेको कार्डले दुविधा उत्पन्न गरेको श्रेष्ठको अनुभव छ । ‘पहिला पनि अन्तर्राष्ट्रिय खेलाडीका लागि कार्डको व्यवस्था थियो । तर धेरै खेलाडीले आफुलाई अन्तर्राष्ट्रिय खेलाडी भन्दौ कार्ड लिए । अन्तर्राष्ट्रिय प्रतियोगितामा भाग लिएकै कारण उनीहरुले आफूलाई अन्तर्राष्ट्रिय खेलाडी भनेका हुन्,’ उनले भने,’ अब बन्ने कानुनले यी सबै विषयमा प्रष्ट पार्ने विश्वास छ।’