काठमाडौं (हाम्रो खेलकुद) – अघिल्लो महिना राष्ट्रिय खेलकुद परिषद् (राखेप) को सदस्य सचिव नियुक्त भएयता रमेशकुमार सिलवालले खेलकुदका भौतिक पूर्वाधार निर्माणको निरक्षणलाई निरन्तरता दिदै आएका छन् । यसै सिलसिलामा उनले हेटौंडाको गौरीटारस्थित केन्द्रीय खेलकुद प्रतिष्ठानको शुक्रबार निरीक्षण गरेका छन् ।

प्रदेश ३ का मुख्य मन्त्री डोरमणि पौडेलको उपस्थितिमा सदस्य–सचिव सिलवालले प्रतिष्ठानको निरीक्षण गर्ने क्रममा त्यहाँ रहेका पूर्वाधारका बारेमा जानकारी लिएको राखेपले जनाएको छ ।
सदस्य सचिव सिलावलले मकवानपुर जिल्लाका खेलकुद विकास समितिका कार्यालय प्रमुख खुशराज दाहालसंग प्रतिष्ठानका बारेमा जानकारी दिए । त्यसअघि प्रदेश ३ का मुख्य मन्त्री पौडेल र सदस्य–सचिव सिलवालबीच विविधि पक्षमा छलफल भएको थियो ।

सदस्य–सचिव सिलवालले हेटौंडा उप महानगरपालिका मेयर हरिबहादुर महतसंग पनि भेट गरी खेलकुदका विषयमा छलफल गरे । १३ औं दक्षिण एसियाली खेलकुद (साग) को तयारीका सिलसिलामा हेटौडमा प्रशिक्षणमा रहेका कुस्ती खेलाडीलाई भेट गरी सिलवालले तयारीका बारेमा जानकारी लिए ।

त्यस्तै उनले मकवानपुर जिल्ला खेलकुद विकास समितिका कर्मचारीसंग पनि भेट गरेका थिए । शुक्रबारै मदन भण्डारी स्पोट्र्स एकेडेमी मकवानपुर जिल्ला कमिटीका पदाधिकारीहरुले सदस्य–सचिव सिलवाललाई कार्यकाल पूर्ण सफलताका लागि शुभकामना दिए ।