काठमाडौं – सातौं राष्ट्रिय खेलकुद अर्को बर्ष आयोजना हुने पक्का भएको छ । अर्थमन्त्री विष्णु पौडेलले आर्थिक बर्ष २०७३/७४ मने बजेट प्रस्तुत गर्ने क्रममा शनिबार सातौं राष्ट्रिय खेलकुदका लागि २० करोड रुपैयाँ छुट्टाएको छन् । छैटौं सकिएको छ बर्ष सम्म पनि सातौं राष्ट्रिय खेलकुद हुन सकेको छैन ।

तस्वीर : इकान्तिपुर

राष्ट्रिय खेलकुद परिषदका सदस्य सचिव केशबकुमार विष्टले बजेट मार्फत सातौं राष्ट्रिय खेलकुद आयोजना सुनिश्चित भएको बताउँछन् । ‘बजेट र अरु कारणले राष्ट्रिय खेलकुद स्थगित हुदै आएको थियो,’ उनले भने,‘अब बजेटका कारण रोक्किन ।’

तथापी सरकारले खेलकुदको पूजिँगत खर्चतर्फ भने गत बर्षको तुलनामा आउने बर्ष घटाएको छ । युवा तथा खेलकुद मन्त्रालयलाई २ अर्ब ४० करोड रुपैयाँभन्दा केही बढी विनियोजन गरेका छन् । जुन गत आर्थिक बर्ष २०७२/७३ को भन्दा झन्डै ५५ करोड रुपैयाँले बढी हो ।
चालु खर्चतर्फ २ अर्ब २० करोड २४ लाख ६५ हजार छुट्टाएको सरकारले पुजिँगत खर्चतर्फ १९ करोड ७९ लाख ६३ हजार रुपैयाँ विनियोजन गरेको छ । यो गत आर्थिक बर्षको भन्दा झन्डै ३ करोड कम हो ।

सरकारले दुई बर्षपछि आयोजना गरिने १३ औं दक्षिण एसियाली खेलकुद (साग) का लागि भौतिक पूर्वाधार निर्माणका बजेट छुट्टाइएको बताएको छ ।

मुस्ताङ र सोलुखुम्बुमा हाइ अल्टिच्युट स्पोर्टस् स्टेडियम निर्माण कार्य पनि आउने बर्ष सुरु गर्ने बताइएको छ ।

पौडेलले विद्यालयस्तरदेखि नै योजनाबद्ध रुपमा खेलाडी उत्पादन र विकास गर्नका लागि ७५ जिल्लाका सबै सामुदायीय विद्यालयहरुमा अनिवार्य रुपमा राष्ट्रपति रनिङसिल्ड प्रतियोगिता आयोजना गरिने बताएका छन् ।
सरकारले बजेटमार्फत आगामी तीन बर्ष भित्र मूलपानी, भैरहवा र धनगढीमा क्रिकेट मैदान निर्माणको कार्य सम्पन्न गर्ने उल्लेख गरेको छ । त्यस्तै डडेलधुरा, बैतडी,धनुषा, मोरङ, दाङ, सुर्खेत र पर्सामा नयाँ क्रिकेट मैदान निर्माणको काम सुरु गर्ने भएको छ ।

झापाको लखनपुर र काठमाडौंमा अन्तर्राष्ट्रियस्तरको रंगशाला आउने बर्षमा सुरु गरिसक्ने मन्त्री पौडेलले प्रतिबद्धता जनाएका छन् । त्यस्तै प्रत्येक प्रदेशमा एउटा रंगशाला र एउटा बहुउद्देश्यी कभर्डहल निर्माणका लागि बजेट व्यवस्था गरेको उनले व्यवस्थापिका संसदमा जानकारी दिए ।