काठमाडौं (हाम्रो खेलकुद)– इटालीमा आयोजना हुने ३० औं समर युनिभर्सियाड २०१९ मा नेपाली खेलाडीले तेक्वान्दो र फेन्सिङमा प्रतिस्पर्धा गर्नेछन् । नेपोलीमा जुलाई ३ देखि १४ तारिख सम्म आयोजना हुने युनिभर्सियाडमा ८ खेलाडीसहित १५ सदस्यीय नेपाली टोलीको सहभागिता रहनेछ ।

युनिभर्सियाडमा भाग लिने तेक्वान्दो खेलाडीमा सक्षम कार्की, नम्रता तुलाधार, पावर्ती गुरुङ, अश्मिता खड्का र उमेश राज भण्डारी छन् । यस्तै फेन्सिङमा ओमकार सिंह, अलिषा सिंह र अनिता कार्कीले प्रतिस्पर्धा गर्नेछन् । तेक्वान्दो खेलाडीका प्रशिक्षकमा ओलम्पियन दीपक विष्ट छन् भने फेन्सिङको व्यवस्थापकमा मदन कार्की छन् ।

नेपाल विश्व बिद्यालय खेलकुद संघका अध्यक्ष प्रदीप ‘टेकराज’ जोशीको नेतृत्वमा रहेको टोलीमा संघका महासचिव पूर्ण सिंह बोहोरा , त्रिभुवन विश्व बिद्यालयको प्रतिनिधीका रुपमा संघका उपाध्यक्ष ज्ञानेन्द्र प्रसाद पौडेल र राष्ट्रिय खेलकुद परिषद्का सदस्य एकेन्द्र कुँवर छन् ।

युनिभर्सियाडमा नेपालको यो पाँचौं सहभागिता हो । ओलम्पिककै झझल्को दिने युनिभर्सियाडमा विश्वका नाम चलेका र ओलम्पिकमा पदक हात पार्ने १ सय ७७ राष्ट्रका ८ हजार भन्दा बढि खेलाडीले विभिन्न खेलमा प्रतिस्पर्धा गर्ने छन् । सांसद एवं पूर्व मन्त्री लेखराज भट्टले टोलीलाई विदाई गरे ।