नुवाकोट (हाम्रो खेलकुद) – नुवाकोटमा जारी प्रथम उपमेयर कप राष्ट्रिय महिला भलिबल प्रतियोगिताको उपाधिका लागि आज होङ्ग्वान्जी न्यू डायमन्ड एकेडेमी र विभागीय सशस्त्र प्रहरीको एपीएफ क्लब  भिड्दैछन्  । खेल, जिल्ला खेलकुद विकास समितिको मैदान कोलनीमा हुनेछ । 

यसअघि आइतबार भएको पहिलो सेमिफाइनलमा डायमन्डले आर्मीमाथि ३–० को सहज जित हात पार्दै उपाधिनजिक पुगेको हो । एपीएफले भने अर्को विभागीय टोली नेपाल पुलिस क्लबलाई सोझो सेटमा पराजित गर्दै फाइनलमा डायमन्डसगँको भेट पक्का गरेको थियो ।

एकपक्षीय खेलमा डायमन्डले आर्र्मीमाथि २५–१२, २५–१२ र २६–२४ को सहज जित निकालेको थियो । अर्काे सेमिफाइनलमा एपीएफले पुलिसलाई २५–१२, २५–१६ र २५–१५ ले पाखा लगाएको थियो । आज पुलिसलाई हराउँदै आर्मी तेस्रो भएको छ ।

जिल्ला खेलकुद विकास समितिको समन्वय तथा नुवाकोट भलिवल संघको सहयोगमा जारी प्रतियोगिताको विजेताले १ लाख ५० हजार रुपैयाँ प्राप्त गर्नेछन् । दोस्रो हुनेले ७५ तथा तेस्रोले ४० हजार रुपैयाँ पाउनेछन् ।

प्रतियोगिताको सर्वोत्कृष्ट खेलाडीले ५ र व्यक्तिगत विधाका स्पाइकर, सेटर, ब्लकर, लिवेरो र सर्भरले जनही ३ हजार रुपैयाँ पाउनेछन् । प्रतियोगिताको फाइनल खेल हाम्रो खेलकुद डट कमले प्रत्यक्ष प्रसारण गर्नेछ ।