नुवाकोट (हाम्रो खेलकुद) – विभागीय टोली त्रिभुवन आर्मी क्लबमाथि सहज जित निकाल्दै होङ्ग्वान्जी न्यु डायमन्ड एकेडेमी नुवाकोटमा जारी प्रथम उपमेयर कप रााष्ट्रिय महिला भलिवल प्रतियोगिताको फाइनलमा प्रवेश गरेका छन् ।

जिल्ला खेलकुद विकास समितिको मैदान कोलनीमा आइतबार बिहान भएको पहिलो सेमिफाइनलमा डायमन्डले आर्मीमाथि ३–० को सहज जित हात पार्दै उपाधिनजिक पुगेको हो ।

एकपक्षीय खेलमा डायमन्डले आर्मीमाथि २५–१२, २५–१२ र २६–२४ को सहज जित निकाल्यो । डायमन्डको जितमा उच्च प्रदर्शन गरेकी प्रतिभा माली खेलको वुमन अफ दि म्याच घोषित भइन् । उनले १ हजार रुपैया पाइन् ।

अब होङ्ग्वान्जी न्यु डायमन्डले उपाधिका लागि आजै हुने दोस्रो सेमिफाइनल एपीएफ र नेपाल पुलिस क्लबको विजेतासँग खेल्नेछ । फाइनल सोमबार हुनेछ ।

विदुर नगरपालिकाको आयोजना, जिल्ला खेलकुद विकास समितिको समन्वय तथा नुवाकोट भलिवल संघको सहयोगमा भएको प्रतियोगिताको विजेताले १ लाख ५० हजार रुपैयाँ हात पार्नेछन् । दोस्रो हुनेले ७५ हजार तथा तेस्रोले ४० हजार रुपैया हात पार्नेछन् ।

प्रतियोगिताको सर्वाेत्कृष्ट खेलाडीले ५ हजार र व्यक्तिगत विधाका स्पाइकर, सेटर, ब्लकर, लिवेरो र सर्भरले जनही ३ हजार पाउनेछन् ।