नुवाकोट (हाम्रो खेलकुद)- उपाधिको दावेदार होङग्वान्जी न्यु डायमन्ड एकेडेमीले शुक्रबार दोहोरो जित निकाल्दै एक खेल अगावै प्रथम उपमेयर कप रााष्ट्रिय महिला भलिवल प्रतियोगिताको सेमिफाइनलमा स्थान बनाएका छन् ।

जिल्ला खेलकुद विकास समितिको मैदान कोलनीमा डायमन्डले शुक्रबार सिन्धुपाल्चोक भलिबल टिम र विभागीय नेपाल पुलिस क्लबमाथि समान ३–० को सहज जित निकाल्दै एक खेल अगावै सेमिफाइनलमा स्थान बनाएको हो ।

अब डायमन्डले आयोजक विदुर नगरपालिकालाई पराजित गरे समूह विजेता बन्नेछ । विदुर नगरपालिकाको आयोजना, जिल्ला खेलकुद विकास समितिको समन्वय तथा नुवाकोट भलिवल संघको सहयोगमा शुक्रबार भएको पहिलो खेलमा डायमन्डले सिन्धुपाल्चोकमाथि २५–३, २५–७ र २५–३ को सहज जित निकाल्दा दोस्रो खेलमा पुलिसलाई २५–१८, २५–१३ र २५–२२ को सहज जित निकाल्यो ।

यो समूहको अर्काे खेलमा आयोजक विदुर नगरपालिकाले सिन्धुपाल्चोकलाई २५–१०, २५–७ र २५–१३ ले हरायो । समूह ‘बी’ मा विभागीय त्रिभुवन आर्मी क्लबले पारामाउन्ट स्कुलमाथि ३–१ को जित निकाल्दै विजयी शुरुवात गरेको छ । आर्मीले पहिलो सेट २५–१४ ले सहजै जितेपनि दोस्रो सेट १७–२५ ले गुमाएको थियो । तर, त्यसपछिको दुवै सेट आर्मीले २५–१८ र २५–१० ले आफ्नो पक्षमा बनायो ।

प्रतियोगितामा १० टोलीले सहभागिता जनाएका छन् । सहभागी टोलीलाई दुई समूहमा विभाजन गरिएको छ । पोल ‘ए’ मा आयोजक विदुर नगरपालिका, नेपाल पुलिस क्लब, सिन्धुपाल्चोक र होङ्ग्वान्जी न्यु डायमन्ड एकेडेमी रहेका छन् ।

पोल ‘बी एपीएफ, त्रिभुवन आर्मी क्लब र पारामाउन्ट स्कुल रहेका छन् । लिग कम नकआउटका आधारमा हुने प्रतियोगिताको दुई समूहका शीर्ष दुई टोलीले सेमिफाइनलमा स्थान बनाउनेछन् । प्रतियोगिताको विजेताले १ लाख ५० हजार रुपैयाँ हात पार्नेछन् । दोस्रो हुनेले ७५ हजार तथा तेस्रोले ४० हजार रुपैया हात पार्नेछन् ।

यस्तै प्रतियोगिताको सर्वाेत्कृष्ट खेलाडीले ५ हजार र व्यक्तिगत विधाका स्पाइकर, सेटर, ब्लकर, लिवेरो र सर्भरले जनही ३ हजार पाउने नुवाकोट भलिवल संघका अध्यक्ष सुवास पाण्डेले जानकारी गराए । प्रतियोगिता आगामी असार २ गतेसम्म संचालन हुनेछ ।