काठमाडौं (हाम्रो खेलकुद)- आयोजक आदर्श विद्यामन्दिर स्कुल (एभीएम) सत्यनारायण बहादुर श्रेष्ठ मेमोरियल अनतर स्कुल राष्ट्रिय टेवल टेनिसमा ११ स्वर्णसहित टिम च्याम्पियन बनेको छ । घरेलु कोर्टमा एभीएमले १५ मध्ये ११ स्वर्ण जित्दै टिम च्याम्पियन बनेको हो ।

प्रतियोगिताको अन्तिम दिन आइतबार गल्र्स यु–१४ मा एभीएमकी इभाना थापा मगरले प्रोक्सिमाकी दिया देउलालाई ३–२ को प्रतिस्पर्धात्मक सेटमा पराजित गर्दै स्वर्ण जितिन् । जनकनाथकी इना डंगोल र प्रभातकी आरती सुवालले कास्य पाइन् ।

गल्स यु–१६ मा एभीएमकी समिरा श्रेष्ठले ब्लुबर्डकी प्रानिका कुवँरलाई ३–२ को सेटमा पराजित गर्दै स्वर्ण जितिन् । प्रभातकी कृतिका तामाङ र जुगलकी अस्तिका थापाले कास्य पाए । गल्र्स सिंगल्समा लिभरपुलकी अन्जु सुवालले आफ्नै स्कुलकी मन्जु सुवाललाई ३–१ को सेटमा पराजित गर्दै स्वर्ण हात पारिन् । मन्जु सुवाल र हिमाली शाक्यले कास्य हात पारे ।

ब्वाइज सिंगल्समा एभीएमका संयोग कपालीले एभीएमकै अच्युत पौडेललाई ३–० को सोझो सेटमा पराजित गर्दै स्वर्ण हात पा¥यो । मिक्स डबल्स्मा एभीएमका विशाल गोले र वियान्का राईको जोडीले एभीएमकै रुविन महर्जन र इभाना थापामगरको जोडीले पराजित गर्दै स्वर्ण जिते । पोक्सिमाका रोमन थापामगर र दिया देउला र एभीएमका सुजन गडाल र समिरा श्रेष्ठले कास्य पाए ।

ब्वाइज डबल्स्मा एभीएमका विशाल गोले र रुविन महर्जनले स्वर्ण, एभीएमका सुजन गडाल र समिर खत्रीले रजत तथा युरोका विश्व बाँनिया र प्रतीकजंग बस्नेत र पब्लिक एकेडेमीकी नवराज राई र सरुण श्रेष्ठले कास्य पाए ।

च्याम्पियनसिप दौरान नै आयोजक एभीएमले राष्ट्रिय खेलकुद परिषदका चिफ कोच रमेशराज जोशी (आर आर गुरु) लाई विशेष सम्मान गरेको छ । आरआर गुरुले झण्डै चार दशक चिफ कोचको रुपमा कार्य गरेका थिए । उनी नेपाल खेलकुद पत्रकार मञ्चले आयोजना गर्ने पल्सर स्पोर्टस् अवार्डको लाइफटाइम अचिभमेन्ट अवार्डबाट पनि सम्मानित भइसकेका थिए ।

विजयी खेलाडीहरुलाई राष्ट्रिय खेलकुद परिषदका सदस्य तथा प्रदेश ३ का खेलकुद संयोजक सुदिल शाही, स्कुलका प्रिन्सिपललगायतले पुरस्कृत गरे । प्रतियोगिता २३ जेठबाट शुरु भएको थियो ।