काठमाडौं (हाम्रो खेलकुद )– दुई महिनापछि नेपालमा आयोजना हुने एसियन भलिबल कन्फेडेरेशन (एभीसी ) एशियन सेन्ट्रल जोन भलिबल प्रतियोगितालाई नेपाल उद्योग वाणिज्य महासंघले प्रायोजन गरेको छ ।

नेपाल भलिबल संघले आज राजधानीमा आयोजना गरेको पत्रकार सम्मेलनमा प्रतियोगिताका लागि वाणिज्य महासंघले ४० लाख रुपैयाँ प्रदान गरेको हो । महासंघका उपाध्यक्ष उमेश लाल श्रेष्ठले संघका अध्यक्ष मनोरञ्जन रमण शर्मालाई चेक हस्तान्तरण गर ।

श्रेष्ठले प्रतियोगिताका लागि महासंघले अन्य सहयोग गर्ने प्रतिबद्दता पनि जनाएका छन् । भलिबल खेलको विकासका लागि व्यवसायिकता पनि आबश्यक रहेको आफुहरुले सहयोग गरेको श्रेष्ठले बताए । यस्तै अनल ज्योती विद्यालयको तर्फबाट प्रधानाध्यापक ज्योती केसीले १ लाख रुपैयाँ हस्तान्तरण गरेकी छन् । 

सोही अवसरमा ढोरपाटन भलिबल क्लबले पनि १ लाख रुपैयाँ दिने घोषणा गरेको छ । प्रतियोगिताका लागि   करिब २ करोड ५० लाख रुपैयाँ खर्च हुने भलिबल संघका महासचिव जितेन्द्र चन्दले जानकारी दिए । प्रतियोगिता सम्पन्न गर्न एभीसीले खेल सामाग्री सहयोग गर्नेछ भने आर्थिक पाटो सघंले नै व्यवस्थापन गर्नुपर्नेछ । 

साउन ३२ देखि भदौ ८ सम्म चल्ने प्रतियोगितामा आयोजक नेपालसहित  बगंलादेश, मालदिभ्स, अफगानिस्तान, किर्गीस्तान, तुर्कमिनिस्तान, उज्वेकिस्तान गरि ७ देशले प्रतिस्पर्धा गर्नेछन् । 

सहभागी टोलीलाई २ समुहमा विभाजन गरिनेछ । समुहका शिर्ष २ टोलीले अन्तिम ४ मा स्थान बनाउनेछन् । प्रतियोगिताका लागि टोलीले आइतबारबाट प्रशिक्षण सुरु गर्ने महासचिव चन्दले बताए  । प्रतियोगिता राष्ट्रिय खेलकुद परिषद् राखेपको कभर्डहल अथवा लगनखेलस्थित नेपाली सेनाको कभर्डहलमा हुने महासचिव चन्दले जानकारी दिए ।