काठमाडौं (हाम्रो खेलकुद)– अर्को महिना आयोजना हुने पल्सर स्पोर्टस अवार्डको प्रत्यक्ष प्रसारण एभिन्यूज खबरले गर्ने भएको छ ।

एभिन्यूज खबरकी सिओओ समृद्धि राजभण्डारी र अवार्ड आयोजक नेपाल खेलकुद पत्रकार मञ्चका अध्यक्ष देवेन्द्र सुवेदीले बिहीबार सम्झौता पत्रमा हस्ताक्षर गरे । अवार्ड असार १७ गने राजधानीमा आयोजना हुनेछ । एभिन्यूजले लामो समयदेखि अवार्डको प्रत्यक्ष प्रसारण गर्दै आएको छ ।

एभिन्यूजकी सिओओ राजभण्डारीले नेपालको प्रतिष्ठित अवार्डमा निरन्तर जोडिराख्न पाउँदा खुसी लागेको बताइन् । मञ्चका अध्यक्ष सुवेदीले लामो समयदेखि साथ दिने सहयात्रीलाई मञ्चले नभुल्ने बताए ।

सोही अवसरमा अवार्डलाई सह प्रायोजनका लागि मञ्च र अन्तर्राष्ट्रिय स्पोर्टस वयर कम्पनी केल्मीबीच सम्झौता भएको छ । केल्मीका लागि नेपालका आधिकारिक विक्रेता कामारु ट्रेडिङका प्रबन्ध निर्देशक उत्तम न्यौपाने र मञ्चका अध्यक्ष सुवेदीले सम्झौता पत्रमा हस्ताक्षर गरे ।

नेपाली फुटबलको महिला र पुरुषका सबै उमेर समूह देखि राष्ट्रिय टोलीलाई प्रायोजन गर्दै आएको केल्मीले सिग्नेचर मनाङ मस्र्याङ्दी क्लब र त्रिभुवन आर्मी क्लबलाई पनि प्रायोजन गरेको छ ।

सोही अवसर केल्मीको वेभसाइट पनि सार्वजनिक गरिएको थियो । प्रबन्ध निर्देशक न्यौपाने र महिला राष्ट्रिय फुटबल टोलीकी स्ट्राइकर सावित्रा भण्डारीले वेभसाइटको लिंक क्लिक गर्दै उद्घाटन गरे ।