काठमाडौं (हाम्रो खेलकुद)– पल्सर स्पोर्टस अवार्डमा स्पोर्टस्लाई केल्मी नेपालले सह प्रायोजन गरेको छ ।

अवार्ड आयोजक नेपाल खेलकुद पत्रकार मञ्चका अध्यक्ष देवेन्द्र सुवेदी र केल्मीका लागि नेपालका आधिकारिक विक्रेता कामारु ट्रेडिङका प्रबन्ध निर्देशक उत्तम न्यौपानेले बिहीबार राजधानीमा आयोजित कार्यक्रममा सम्झौता पत्रमा हस्ताक्षर गरे । अवार्ड असार १७ गते काठमाडौंमा आयोजना हुँदैछ ।

प्रायोजन वापत केल्मीले मञ्चलाई २ सय वटा टिसर्ट र अवार्डको मनोनयमा पर्ने ३० जनालाई ट्रयाकसुट प्रदान गर्ने मञ्चका अध्यक्ष सुवेदीले जानकारी दिए । कामारुका प्रबन्ध निर्देशक न्यौपानले सहकार्यका लागि मौका दिएको मञ्चलाई धन्यवाद दिदै भविष्यमा पनि सहकार्य जारी रहनेमा आशावादी रहेको बताए । सम्झौता तीन वर्षको रहने बताइएको छ ।

नेपाली फुटबलको महिला र पुरुषका सबै उमेर समूह देखि राष्ट्रिय टोलीलाई प्रायोजन गर्दै आएको केल्मीले सिग्नेचर मनाङ मस्र्याङ्दी क्लब र त्रिभुवन आर्मी क्लबलाई पनि प्रायोजन गरेको छ ।

न्यौपाने नेपालमा नम्बर वाड स्पोर्टस वयर ब्रान्ड बन्ने लक्ष्य राखेको र मञ्चसँगको सहकार्यले त्यसमा मद्दत पुग्नेमा विश्वास व्यक्त गरे । त्यस्तै उनले बजारमा केल्मीको नाम र राष्ट्रिय टोलीको नक्कली जर्सी आएकोले त्यसमा सचेत रहन सबैलाई आग्रह गरे । मञ्चका अध्यक्ष सुवेदीले प्रायोजनका लागि केल्मीलाई धन्यवाद दिए ।

सोही अवसर केल्मीको वेभसाइट पनि सार्वजनिक गरिएको थियो । प्रबन्ध निर्देशक न्यौपाने र महिला राष्ट्रिय फुटबल टोलीकी स्ट्राइकर सावित्रा भण्डारीले वेभसाइटको लिंक क्लिक गर्दै उद्घाटन गरे ।

त्यस्तै सोही अवसरमा मञ्चले अवार्डको प्रत्यक्ष प्रसारणका लागि एभिन्यूज टेलिभिजनसँग सम्झौता पत्र नविकरण गरेको छ । लामो समयदेखि एभिन्यूजले अवार्डको प्रत्यक्ष प्रसार गर्दै आएको छ ।