काठमाडौं (हाम्रो खेलकुद)- न्यु डायमन्ड एकेडेमीका प्रिन्सिपल महिला भलिबलका प्रशिक्षक कुमार राईसँगै चार खेलकर्मी बिहीबार सम्मानित भएका छन् ।

इरा इन्टरटेनमेन्टले विभिन्न खेलहरुमा आफ्नो माध्यमबाट नेपाललाई विश्वसामु चिनाएको भन्दै प्रशिक्षक राईसहित ४ जनालाई सम्मानित गरेको हो ।

सम्मानित हुनेमा भलिबलका कुमार राई, तेक्वान्दोका नोर्वु लामा, बडिबिल्डिङका महेश्वर महर्जन र रेस्लिङका कमल लामा (नुवाकोटे टाइगर) रहेका छन् । उनीहरुलाई दोसल्ला र ताम्रपत्रले सम्मानित गरेको हो ।

प्रशिक्षक राईलाई प्रदान गरिएको ताम्रपत्रमा नेपाली नारीहरुलाई चुलो चौकामा मात्र सीमित गराउने पितृसत्तात्मक समाजमा खेलकुद प्रवाह गरी राष्ट्रका लागि उत्कृष्ट खेलाडी उत्पादन गरी नेपालको शिर उचो पार्ने कार्य गरेको उल्लेख छ ।

तेक्वान्दो प्रशिक्षक तथा पुर्व खेलाडी नोर्वु लामाले नेपालमा तेक्वान्दो खेल बिकासमा योगदान गरेको उल्लेख छ । बडिबिल्डिङका महेश्वर महर्जनले गत वर्ष थाइल्यान्डमा आयोजना भएको विश्व बडिबिल्डिङ च्याम्पियनसिपमा आफ्नो तौल समूहमा स्वर्ण जित्दै नेपालको शिर उचो पारेको थियो ।

रेस्लिङका कमल लामा (नुवाकोटे टाइगर)लाई नेपालमा रेस्लिङ बिकासमा योगदान पु¥याएको भन्दै सम्मानित गरिएको हो । सम्मानसँगै इरा इन्टरटेनमेन्टले ‘खेलाडी’ नामको नाटक मञ्चन गरिएको थियो ।