काठमाडौं (हाम्रो खेलकुद) – सोलुखुम्बुका सुमन कुलङले पुरुष र सुनमाया बुढाले महिलातर्फको तेन्जिङ हिलारी एभरेस्ट म्याराथन उपाधि जितेका छन् ।

६६औं अन्तर्राष्ट्रिय सगरमाथा दिवसको अवसरमा बुधबार भएको प्रतियोगितामा ४२ किलोमिटरको दुरी सुमनले ३ घण्टा ४७ मिनेट १६ सेकेण्डमा पुरा गरे । १७ औं एभरेष्ट म्याराथनमा महिलातर्फ सुनमायाले ५ घण्टा तीन मिनेट ४ सेकेण्डमा पुरा गरिन् ।

रोजिना भण्डारी ५ घण्टा २४ मिनेट १२ सेकेण्डमा दुरी पार गर्दै दोस्रो र हुमी बुढामगर ५ घण्टा २९ मिनेट १५ सेकेण्डमा पार गर्दै तेस्रो भए । पुरुषतर्फ कपिलदेव बुढा निर्धारित दुरी ३ घण्टा ५६ मिनेटमा पार गर्दै दोस्रो र रामकुमार राजभण्डारी ३ घण्टा ५८ मिनेटमा पार गर्दै तेस्रो भए ।

महिला र पुरुष दुवै प्रतियोगिताका विजेताले ५० हजार रुपैयाँ प्राप्त गरे । त्यस्तै दोस्रो हुनेले ३५ हजार र तेस्रो हुनेले २५ हजार रुपैयाँ पुरस्कार हात पारे । स्ट्रिम अल्ट्रा एभरेष्ट म्यारथनको उपाधि किरण कुलुङले हात पारेका छन् ।

किरणले ७ घण्टा १० मिनेट १९ सेकेण्डमा पुरा गरेर उपाधि जितेका हुन् । दोस्रो भएका अर्जुन कुलुङले ७ घण्टा १४ मिनेट १५ सेकेण्डमा दौड पुरा गरे । ७ घण्टा २७ मिनेट ४६ सेकेण्डमा पुरा गर्दै पुर्ण तामाङ तेश्रो भए । विजेताले १ लाख, दोस्रोले ७५ हजार र तेस्रो हुनेले ५० हजार रुपैयाँ प्राप्त गरे ।