काठमाडौं (हाम्रो खेलकुद) – चोटका कारण नेपाली राष्ट्रिय महिला भलिबल टोलीकी महत्वपूर्ण सदस्य कमला पुन कम्तीमा ३ महिना कोर्ट बाहिर रहनु पर्ने भएको छ ।

दायाँ घुँडाको चोटका कारण नेपाल पुलिस क्लबकी समेत लिवेरो रहेकी कमला ३ महिना वा त्यो भन्दा बढी पनि बाहिर रहनु पर्ने सक्ने हाम्रो खेलकुदलाई बताइन् ।

उनको घुँडामा पानी जमेको र लिगामेन्ट च्यातिएको बताइएको छ । बि एण्ड बी अस्पतालमा भर्ना भएकी उनको शुक्रबार शल्यक्रिया हुने बताइएको छ ।

जाडो याममा घुँडामा समान्य दुखाई हुने भएले पनि गर्मी मौसममा भने बढी दुख्ने गरेको उनले अनुभव सुनाइन् । ‘एमआरआई गरेर हेर्दा पानी जमेको र लिगामेन्ट च्यात्तिएको डक्टरले बताउनुभयो,’ उनले भनिन्, शल्यक्रियापछि ३ महिना आराम गर्नुपर्ने बताइएको छ ।

गत महिना शेरबहादुर खड्का स्मृति प्रतिष्ठानले आयोजना गरेको केएपी महिला राष्ट्रिय भबिलका दौरान बढी दुःखाई भएका कारण जचाएको उनले बताइन् ।

चोटका वावजुद आफुले सभामुख कप, न्यु डायमन्ड, ढोरपाटन लिग, दिदीबहिनी कप, आइजिपी कप, आठौं राष्ट्रिय खेलकुद र शेरबहादुर खड्का स्मृति भलिबल गरी सात प्रतियोगितामा खेलेको उनले सुनाईन् ।

म्याग्दीमा जन्मिएकी कमला २०७० बाट राष्ट्रिय टोलीको नियमित सदस्य हुन् । त्यसयता उनले आधा दर्जन अन्तर्राष्ट्रिय प्रतियोगिता खेलिसकेकी छिन् । लिवेरो उनी दुई वर्षयता लिफ्टरको भुमिकामा खेलिरहेकी छिन् ।