काठमाडौं (हाम्रो खेलकुद)- चीनको नानिङ शहरमा जारी टोटल बिडब्लुएफ सुदिरमान कप ब्याडमिन्टनमा –२०१९ मा नेपालले आफ्नो दोस्रो खेलमा अष्ट्रेलियासँग हार बेहोरेको छ । टोटल बिडब्लुएफ सुदिरमान कप–२०१९ मा डेब्यु खेल खेलिरहेको नेपाल दोस्रो खेलमा ३–२ ले पराजित भएको हो ।

मंगलबार भएको मिक्स टिम च्याम्पियनसिप अन्तरगतको ५ विधामध्ये नेपालले पुरुष एकल र पुरुष डबल्स्मा जित हात पारेपनि अन्य तीन विधामा हार बेहारेपछि नेपाल अष्ट्रेलियासँग पराजित भयो ।

पुरुष एकलमा नेपालका शीर्ष वरीयताका रत्नजित तामाङले असवान्त गोवीनाथालाई २–० को सोझो सेटमा पराजित गरेको थियो । रत्नले असवान्तमाथि २१–१९ र २१–१४ को सहज जित निकालेको थियो । पुरुष डबल्स्मा रत्नजित र दिपेश धामीको जोडीले सिमोन विङ हाङ लिङ र इकि भुवोङको जोडीमाथि २१–१७ र २१–१६ को जित निकालेको थियो ।

मिक्स डबल्स्मा दिपेश धामी र अमिता गिरीको जोडी सिमोन विङ हाङ लिङ र ग्रान्या समरभिलीको जोडीसँग २१–११ र २१–१२ ले पारजित भए । महिला एकलमा नङ्सलदेवी तामाङ टिफानी होसँग २–१ को सेटमा पराजित भइन् ।

नङ्सलले पहिलो सेट १२–२१ ले सहजै गुमाएपनि दोस्रो सेटमा २१–१८ को जित निकाल्दै पुनरागमन गरेकी थिइन् । तर, तेस्रो सेटमा नङ्सल १८–२१ ले नै पराजित भइन् । महिला डबल्स्मा नङ्सल र अमिताको जोडी टिफानी हो र ग्रोन्या समरभिलीको जोडीसँग २१–६ र २१–५ को सेटमा पराजित भइन् ।

५ सिरिजको खेलको दुई चरणको खेल सकिदा नेपाल २–० ले पछि परेको छ । नेपाल पहिलो खेलमा आयरल्यान्डसँग ५–० ले पराजित भएको थियो । अब नेपालले बुधबार न्युजिल्यान्डसँग प्रतिस्पर्धा गर्दैछ ।