काठमाडौं(हाम्रो खेलकुद)- नेपाल गल्फ संघले एमेच्योर खेलाडी भएर पनि प्रो. गल्फ जित्ने तीन एमेच्योर गल्फरलाई शनिबार नगदसहित सम्मानित गरेका छन् । संघले शनिबार राजधानीमा पत्रकार सम्मेलनको आयोजना गर्दै तीन एमेच्योर गल्फर शुक्र बहादर राई, टंक बहादुर कार्की र सुवास तामाङलाई नगदसहित सम्मानित गरेको हो ।

शुक्र र टंक जनही ५०–५० हजार रुपैया नगदसहित सम्मानित हुदा सुवासलाई संघले २५ हजार रुपैया प्रदान गरे । खेलाडीलाई राष्ट्रिय खेलकुद परिषद (राखेप)का सदस्यसचिव केशबकुमार बिष्ट, संघका अध्यक्ष टासी घले लगायतले सम्मानित गरे ।

एमच्योर शुक्रले यससिजन प्रो खेलाडीलाई पछि पार्दै सुर्य नेपाल प्रिमियर गल्फ च्याम्पियनसिप र सुर्य नेपाल ईष्टन ओपन गरी दुई उपाधि जितेका थिए । यस्तै टंकले आठौं राष्ट्रिय खेलकुदमा स्वर्ण तथा सुबासले सुर्य नेपाल गल्फ टुर अन्तर्गतको सुर्य नेपाल च्यालेन्ज गल्फको उपाधि जितेका थिए ।

सदस्यसचिव बिष्टले पूर्वाधारको कारणले नेपालमा खेलाडी धेरै उत्पादन नभएको भएपनि प्रतिभावान खेलाडीहरु नेपालमा रहेको बताए । उनले नेपालमा आयोजना हुने १३औं सागका लागि राखेपले सहयोग गर्ने र पदक ल्याउने गरी तयारी गर्न सुझाब दिए ।

यस्तै संघका अध्यक्ष घलेले सागमा नेपालले गल्फबाट पदक ल्याउनेमा आशावादी रहेको बताउदै घरेलु भुमिमा हुने प्रतियोगिताबाट पदक नल्याए संघमा नबस्ने बताए । उनले १३औं सागको लागि आगमी साउनदेखि तयारी थाल्नका लागि थाइल्यान्ड र बंगलादेशमा छलफल भइरहेको र राखेपलाई सहयोग गर्न आग्रह समेत गरे ।