काठमाडौ (हाम्रो खेलकुद)– नेपाल क्योकुशिन बुदो कराते साकाई इन्टरनेशनलले आठौं राष्ट्रिय खेलकुदमा पदक विजेता आफ्ना खेलाडीलाई सम्मान गरेको छ । राजधानीमा शुक्रबार कार्यक्रम गर्दै पदक विजेता खेलाडीलाई सम्मान गरेको हो ।

गत महिना प्रदेश ५ मा सम्पन्न आठौं राष्ट्रिय खेलकुदको फुलकन्ट्याक्ट ६० किलो तौल भन्दा कममा स्वर्ण जित्न सफल सन्तोष कुमार लामा,उसुबाट स्वर्ण जितेकी विन्दु पुन र रजत विजेता विनोद निरौलालाई नगद र प्रमाणपत्र सहित सम्मान गरेको हो ।

आठौंमा उत्कृष्ट प्रर्दशन गरेपनि पदक जित्न नसकेका निशा बोहोरा र विनोद थापालाई पनि प्रत्साहन स्वरुप इन्टरनेशनलले समान्न गर्यो । अध्यक्ष भुषण महर्जन, ब्राण्ड चिफ तथा प्रशिक्षक राम बहादुर बम्जन,सदस्य तथा पुर्व खेलाडी सोनु महर्जन,महासचिव अजय महर्जन लगायतले सम्मान गरे ।

त्यस्तै संघले कार्यक्रममा यूकेबाट मान्यता प्राप्त अन्तर्राष्ट्रिय प्रमाणपत्र विभिन्न जिल्लाका ३० जना खेलाडीलाई प्रदान गरेको छ । राष्ट्रिय प्रमाणपत्र १२ जना खेलाडीलाई प्रदान गरेको थियो । क्योकुशिन बुदो कराते इन्टरनेशनल एक वर्ष अघि स्थानपना भएको थियो ।

सम्मानपछि बोल्दै प्रशिक्षक राम बहादुर बम्जनले खेलाडीलाई निरन्तर मेहिनत गर्न आग्रह पनि गरे । अध्यक्ष महर्जनले खेलाडीको प्रर्दशनबाट आफु उत्साहित भएको उल्लेख गर्दै सहयोगी सबैलाई धन्यवाद दिए ।