काठमाडौं (हाम्रो खेलकुद) – प्रथम व्हीलचियर एसिया कप टी ट्वान्टी क्रिकेट प्रतियोगितामा आयोजक नेपाल भारतसँग ६ विकेटले पराजित भएको छ ।

कीर्तिपुर क्रिकेट मैदानमा भएको प्रतियोगिताको पहिलो खेलमा नेपालले प्रस्तुत गरेको १ सय ४१ रनको लक्ष्य भारतले १५.१ ओभरमा ४ विकेट गुमाउँदै पुरा गर्यो । भारतको सहज जितमा विश्वनाथ गौरभले ३२ बलमा ९ चौका सहित ५० रनको योगदान दिए । त्यस्तै पशुराम देसाइल १९, निखुल प्रजापति र सन्तोषले समान १९ रन जोडे । नेपालका डम्बर मगर,राजु कटुवाल,यम श्रेष्ठ र विपिन पौडेलले समान १ विकेट हात पारे ।

त्यस अघि टस हारेर कीर्तिपुर क्रिकेट मैदानमा पहिला ब्याटिङ थालेको नेपालले निर्धारित २० ओभरमा ४ विकेट गुमाउँदै १ सय ४० रन बनाएको थियो । नेपालका लागि कप्तान दिगम चेमजोङ ६६ बलमा ७ चौका सहित ६६ रनको अविजित पाली खेलेका थिए । बिपिन पौडेल ३३,रमेश खत्री १५ सागर पान्डेले ७ रन जोडे । भारतका पशुराम देसाइल,सौरभ मालिक र सन्तोषले समान १ विकेट हात पारे ।

त्यस्तै आज भएको अर्को खेलमा पाकिस्तानले बंगलादेशलाई ८ विकेटले पराजित गर्यो । टस हारेर पहिला ब्याटिङको निम्तो पाएको बंगलादेशले निर्धारित २० ओभरमा ४ विकेट गुमाउँदै १ सय ७७ रन बनाएको थियो । उसका लागि सजाद हसनले ५२ बलमा १३ चौका सहित ७४ रनको उत्कृष्ट पाली खेलेका थिए । पाकिस्तानका मोहम्मद बमिनले २ विकेट लिए । १ सय ७८ रनको विजयी लक्ष्य पाकिस्तानले १६.३ ओभरमा २ विकेट गुमाउँदै पुरा गरेको थियो । उसका लागि मोहम्मद सजाद अली अब्बासी र मोहम्मद लाटिफसमानल ५१ रन जोडे । बैशाख ४ गते सम्म कीर्तिपुर क्रिकेट मैदानमा चल्ने प्रतियोगितामा नेपाल,भारत,पाकिस्तान र बंगलादेश रहेका छन् । लिग चरणपछि शिर्ष दुई टोली उपाधिको लागि भिड्ने छन् ।