काठमाडौं (हाम्रो खेलकुद) – चन्द्रागिरी नगरपालिकास्थित नैकापमा नेपाल ब्याडमिन्टन संघको सुविधा सम्पन्न एकडेमी र कभर्डहल बन्ने भएको छ ।

चन्द्रागिरी नगरपालिका वडा नम्वर १४ मा स्थित नैकाप भन्ज्याङ नजिक रहेको करिव ८ रोपनी क्षेत्रफलमा बन्न लागेको कभर्डहल र एकेडेमीको राष्ट्रिय खेलकुद परिषद (राखेप) का सदस्यसचिव केशव कुमार विष्टले मंगलबार सिलान्यास गरे ।

यो नेपाल ब्याडमिन्टन संघको आफ्नो पहिलो कभर्डहल र एकेडेमी हुनेछ । संघले चन्द्रागिरी नगरपालिका वडा नम्वर १४ र स्थानियसँग एकेडेमी र हलको लागि लिखित सम्झौता गरेको हो । एकेडेमी ५० देखि ६० जनाको क्षमताको तथा कभर्डहलमा पाँच कोर्ट हुने बताइएको छ ।

संघका अध्यक्ष श्रेष्ठले एकेडेमी र कभर्डहलको काम सुरु भइसकेको ३ वर्षभित्र सम्पन्न गर्ने लक्ष्य रहेको बताए । उनका अनुसार कभर्डहल एक वर्षभित्रमा तयार हुनेछ ।

‘पछिल्लो समय नेपालमा ब्याडमिन्टन लोकप्रिय भइरहेको छ । खेलाडीहरुले पनि राम्रा गरिरहेका छन् । नेपालमा ब्याडमिन्टनबाट पदकको सम्भावना देखिएको छ,’ अध्यक्ष श्रेष्ठले भने, ‘यस्तो अवस्थामा एकेडेमी र कभर्डहल बन्नु ब्याडमिन्टन परिवारका लागि खुसीको कुरा हो । यहाँ स्थानिय खेलाडीहरुले प्रशिक्षण गर्नेछन् । यहीबाट राष्ट्रिय खेलाडी जन्मन सक्नेछन् ।’

यस आर्थिक वर्षको लागि नेपाल सरकारले ४० लाख रुपैया उपलब्ध गराएको र अर्को आर्थिक वर्षमा टेन्डरमार्फत जानुपर्ने बताए । एकेडेमी र कभर्डहलका लागि त्यहाँ उपभोक्ता समिति बनिसकेको छ ।

एकेडेमी र कभर्डहल निर्माणको लागि करिव १० करोड लागत लाग्ने अनुमान गरिएको छ ।
संघले यसअघि मिनभवनमा कोर्ट बनाएपनि पछि त्यो स्कुललाई जिम्मा दिइएको थियो । पछिल्लो समय नेपाली ब्याडमिन्टनले अन्तर्राष्ट्रिय मञ्चमा उच्च प्रदर्शन गरिरहेका छन् । युवा स्टार प्रिन्स दाहाल थाइल्यान्डमा सम्पन्न सिंगा रोजा बिटिआई जुनियर ब्याडमिन्टनमा सात देशका खेलाडीलाई पछि पार्दै दोस्रो हुन सफल भएको थियो ।

शीर्ष वरीयताका रत्नजित तामाङ एसियन ब्याडमिन्टन च्याम्पियनसिपको तेस्रो चरणमा तथा दिपेश धामी र शोभा गौचनको जोडीले पाकिस्तानमा सम्पन्न ब्याडमिन्टनमा पदक जित् नसफल भएका थिए ।