काठमाडौं (हाम्रो खेलकुद)– न्यु डायमन्ड एकेडेमी प्रथम प्यारामाउण्ट कप अन्तर बिद्यालय महिला भलिबल प्रतियोगिताको च्याम्पियन बनेको छ । कुलेश्वर तिनकुनेस्थित पारामाउन्ट स्कुल नजिकको भलिबल कोर्टमा भएको फाइनलमा डायमन्डले आयोजक पारामाउन्ट हरियोलाई ३–० को सोझो सेटमा पराजित गर्दै च्याम्पियन बनेको हो ।

प्रतिस्पर्धात्मक बनेको पहिलो सेट डायमन्डले २५–२३ ले जितेको थियो । तर, त्यसपछिको दुवै सेट डायमन्डले २५–१७ र २५–१४ ले जित्न सफल भयो । आयोजक पारामाउन्ट निलोले परोपकार माध्यमिक विद्यालयलाई ३–२ को सेटमा पराजित गर्दै तेस्रो स्थान हात पार्यो । निकै रोचक बनेको खेलमा २५–२३, २१–२५, २५–२३, १९–२५ र १५–१० को जित निकाल्यो ।

उपाधिसँगै डायमन्डले २० हजार रुपैयाँ, आयोजक हरियोले १५ हजार तथा तेस्रो टोली आयोजक निलोले १० हजार र परोपकारले ५ हजार रुपैयाँ प्राप्त गर्यो । परोपकारले फेयर प्लेको उपाधि जित्न सफल भयो ।

डायमन्डकी वालमिका आचार्य प्रतियोगिताको सर्वोत्कृष्ट खेलाडी चुनिए । उनले २ हजार रुपैया पाए । पारामाउन्टकी सृष्टि खड्गी उत्कृष्ट स्पाइकर पारामाउन्टकि अनिशा श्रेष्ठ उत्कृष्ट सेटर, न्यु डायमन्डकी रस्मिता दुरा उत्कृष्ट डिफेन्डर, डायमन्डकी रिया कुँवर उत्कृष्ट सर्भर डायमन्डका कुमार राई उत्कृष्ट प्रशिक्षक चुनिए । उनीहरु सबैले समान १ हजार रुपैयाँ पाए ।

खेलाडीहरुलाई नेपाल भलिबल संघका महासचिव जितेन्द्र बहादुर चन्द, सचिव मनविर छन्त्याल, लोकनाथ पोखरेल र विद्यालयका प्रिन्सिपल गोकर्ण लिम्बू लगायतले पुरस्कृत गरे । तीन दिने प्रतियोगितामा आयोजक पारामाउन्टको दुई टोलीसहित ६ टोलीको सहभागिता जनाएको थियो ।