काठमाडौं (हाम्रो खेलकुद) – नेपाली महिला राष्ट्रिय भलिबल टोलीकी महत्वपुर्ण सदस्य सरस्वती चौधरी सम्मिलित आँधीखोला स्पोर्टस् क्लब हङकङले १२औं स्याङ्जा कप भलिबल प्रतियोगिता अन्तरगतको महिलातर्फको उपाधि जितेको छ।

टुइन मुन हङकङमा भएको महिलातर्फको फाइनलमा सरस्वती चौधरी सम्मिलित आँधीखोला स्पोर्टस् क्लब हङकङले नेपाली राष्ट्रिय टोलीकी उपकप्तान मन्जु गुरुङ सम्मिलित पर्वत क्लब हङकङलाई २–१ को सेटमा पराजित गर्दै उपाधि जितेको हो ।

आँधीखोलाले पहिलो सेट १९–२५ ले गुमाएपनि दोस्रो र तेस्रो सेट २५–२३ र २५–१३ ले जित्दै उपाधि जित्न सफल भयो । उपाधिसँगै आँधीखोलाले ३ हजार हङकङ डलर प्राप्त ग¥यो ।

सरस्वतीले आफ्नो टोली एपीएफलाई लगातार पाँचौपटक केएनपी जापान राष्ट्रिय महिला भलिबलमा च्याम्पियन बनाएलगत्तै बुधबार मात्रै हङकङ पुगेकी थिइन् ।

पुरुषतर्फ हलेसी स्पोर्टस् क्लबले आँधीखोला स्पोर्टस् क्ललाई २–१ को सेटमा पराजित गर्दै उपाधि जित्न सफल भयो । निकै नै प्रतिस्पर्धात्मक बनेको खेलमा हलेसीले २१–२५, २५–१५ र २५–२३ ले जित्न सफल भयो ।

प्रतियोगिताको महिला तथा पुरुषमा ६ टोलीको सहभागिता रहेको थियो । पुरुषतर्फ पोल ‘ए’ मा घान्द्रुक समाज, हलेसी क्लब र बाग्लुङ समाज तथा पोल ‘बी’ मा आँधीखोला स्पोर्टस् क्लब, पुन क्लब र पर्वत क्लब रहेको थियो ।

महिलातर्फ पोल ‘ए’ मा घान्द्रुक समाज, पर्वत क्लब र नेप्लिज क्लब रहेका छन् । पोल ‘बी’ मा पुन क्लब, लिम्बुवान र आँधीखोला स्पोर्टस् क्लब रहेका छन् ।