नेपालगन्ज (हाम्रो खेलकुद)– उपराष्ट्रपति नन्दबहादुर पुनको प्रमुख आतिथ्यततामा प्रदेश ५ मा जारी आठौं राष्ट्रिय खेलकुदको समापन हुने भएको छ । आठौंको समापन वैशाख ११ गते नेपालगन्ज रंगशालामा हुँदैछ ।

समापनमा उपराष्ट्रपति प्रमुख अतिथि रहने राष्ट्रिय खेलकुद परिषद् (राखेप) का सदस्य सचिव केशवकुमार विष्टले बताएका छन् । यसअघि प्रधानमन्त्री केपी शर्मा ओली समापनको प्रमुख अतिथि रहने बताइएको थियो । व्यक्तिगत व्यस्तताका कारण प्रधानमन्त्री आउन असमर्थ रहेपछि उपराष्ट्रपति आउने भएका हुन् ।

चैत २७ गते देखि प्रदेश ५ का विभिन्न जिल्लामा सुरु भएको आठौं राष्ट्रिय खेलकुदको औपचारिक उद्घाटन राष्ट्रपति विद्यादेवी भण्डारीले वैशाख ५ गते नेपालगन्ज रंगशाला गरेकी थिइन् । भव्य उद्घाटन समारोहमा अतिशबाजीसँगै विविध सांस्कृतिक झाँकी लगायत प्रस्तुति रहेको थियो । समापन समारोहमा पनि सोहि किसिमका प्रस्तुति तथा नवौं राष्ट्रिय खेलकुदको आयोजना गर्ने जिम्मेवारी हस्तान्तरण गरिने सदस्य सचिवले जानकारी दिए ।

आठौंमा ३५ खेलका ५ हजार २ सय ११ खेलाडीले प्रतिस्पर्धा गरिरहेका छन् । जसमा ३ सय ७२ स्वर्ण, ३ सय ७२ रजत र ५ सय ६३ कास्य पदकका लागि प्रतिस्पर्धा भइरहेको छ । अहिले सम्म ७५ स्वर्ण, ४६ रजत र ३९ कास्य पदकका साथ नेपाली सेना पदक तालिकाको शीर्षस्थानमा रहेको छ ।