काठमाडौं (हाम्रो खेलकुद) – नेपाल एपीएफ क्लबका विक्रम मगर र प्रदेश नम्वर ३ का अमिर ब्लोन आठौं राष्ट्रिय खेलकद अन्तरगतको पुरुष स्क्वास प्रतियोगिताको तेस्रो चरणमा प्रवेश गरेका छन् ।

बुधबार भएको पहिलो खेलमा विक्रमले पहिलो चरणमा प्रदेश १ का नैन बहादुर मगरलाई र दोस्रो चरणमा प्रदेश ३ का विनोदरत्न शाक्यलाई पराजित गर्दै तेस्रो चरणमा स्थान बनाउन सफल भएका हुन् । बिक्रमले नैनमाथि ३–२ को सेटमा जित निकाले ।

पहिलो सेट ११–५ ले सहजै जितेको बिक्रमले दोस्रो सेट १७–१९ ले गुमाएको थिए । तेस्रो सेट ११–८ ले जितेका विक्रमले चौथो सेट ८–११ ले गुमाएपनि पाँचौ सेट ११–६ ले आफ्नो पक्षमा पार्न सफल भए । अर्काे खेलमा विक्रमले विनोद रत्न शाक्यलाई ३–० को सोझो सेटमा हराए ।

यस्तै पहिलो चरणमा वाकओभर पाएका अमिरले दोस्रो चरणमा विजय मगरलाई ३–१ को सेटमा हराए । पहिलो चरणमा प्रदेश ५ का गोपाल थापा, गण्डकी प्रदेशका कासीराम भण्डारी, प्रदेश १ का निशान्त अग्रवाल, एपीएफका विजय मगर, एपीएफकै मित्रलाल गुभार, प्रदेश १ का आश्विन तोडी र नेपाल पुलिसका आकाश सुनुवारल सफलता हात पारे ।

दोस्रो चरणमा प्रदेश ३ का राजेन्द्र शाक्य, एपीएफका उमित शाक्य, गण्डकी प्रदेशका अमृत थापामगर र प्रदेश ३ का प्रविन कंसकारले सफलता हात पारे ।

स्क्वासमा प्रदेश १, २, ३, ५, गण्डकी प्रदेश, नेपाल प्रहरी र एपीएफ क्लबबाट २४ पुरुष र ५ महिला गरी २९ खेलाडीको सहभागिता रहने छ । पुरुष तथा महिला सिंगल्स तथा पुरुष टिम इभेन्ट गरी ३ स्पर्धामा प्रतिस्पर्धा हुनेछ । प्रतियोगिता बैशाख २ गते सम्पन्न हुनेछ । प्रतियोगिताको सुचना तथा सञ्चार मन्त्री गोकुल प्रसाद बास्कोटाले सातदोबाटोमा रहेको स्क्वास कोर्टमा प्रतियोगिताको उद्घाटन गरे ।