काठमाडौं (हाम्रो खेलकुद) – नेपाल खेलुकद पत्रकार मञ्च (एनएसजेफ) को अध्यक्षमा दुर्गानाथ सुवेदी (देवेन्द्र) निर्वाचित भएका छन्  ।

राजधानीमा शुक्रबार भएको मञ्चको १५औं चुनावी साधरणसभाले दुर्गानाथ सुवेदी (देवेन्द्र) को अध्यक्षमा तीन वर्षको लागि नयाँ कार्यसमिति चयन गरेको हो । देवेन्द्रले अध्यक्षका प्रत्यासी प्रकाश तिमल्सिनालाई १४ मतले पराजित गर्दै अध्यक्षमा निर्वाचित भए । देवेन्द्रले ५५ तथा प्रकाशले ४१ मत प्राप्त गरे ।

प्रथम उपाध्यक्षमा संजीव शिल्पकार निर्विरोध निर्वाचित हुँदा दुई उपाध्यक्षमा ध्रुव तुलाधर र निरञ्जन अधिकारी निर्वाचित भए । ध्रुबले ७१ र निरञ्जनले ५७ मत पाए । अर्का प्रत्यासी श्रीलोचन राजोपाध्यायले ४१ मत पाएका थिए ।

महासचिवमा प्रज्वल ओली निर्वाचित भए । प्रज्वलले ६३ मत पाए । उनका प्रत्यासी पवन आचार्यले ३३ मत ल्याए । सचिवमा गोविन्द रेग्मी निर्वाचित भए । गोविन्दले ५८ मत पाए । अर्का प्रत्यासी आदर्श ढकालले ३८ मत ल्याए । कोषाध्यक्षमा अञ्जन खड्का निर्विरोध निर्वाचित भए ।

महिला सदस्यमा मुना कार्की निर्विरोध निर्वाचित भईन् । तीन सदस्य पदका लागि भएको निर्वाचनबाट निर्वाचित दिलबहादुर तामाङले ५०, हिमविक्रम केसीले ४४ र अनिल मल्ल ठकुरीले ३६ मत पाए । सदस्य पदका लागि सातजनाको उम्मेद्वारी परेको थियो । साधारण सभामा मञ्चका ९८ सदस्य मध्ये ९६ जना सदस्यको सहभागिता रहको थियो । यसअघि चुनावी साधारण सभाको राष्ट्रिय खेलकुद परिषद् (राखेप) का सदस्य सचिव केशब कुमार बिष्टले उदघाटन गरेका थिए ।