काठमाडौं (हाम्रो खेलकुद) – जापानको मिकी सिटी महानगरपालिकाले नेपालको पारा तेक्वान्दो खेलाडीलाई प्रशिक्षणमा सहयोग गर्ने भएको छ । अर्को वर्ष (सन् २०२०) जापानमा आयोजना हुन लागेको टोकियो ओलम्पिकलाई मध्यनगर गर्दै महानगरपालिकाले पारा तेक्वान्दो खेलाडीलाई विशेष प्रशिक्षणको व्यवस्था मिलाएको हो ।

एक हप्ते विशेष प्रशिक्षणमा खेलाडीहरु पलेसा गोवद्र्धन, विक्रम श्रेष्ठ, रोहित राई, सुवासचन्द्र राई र दीपेश महत तथा प्रशिक्षक कविराज नेगी लामा सहभागी हुने छन् । खेलाडी प्रशिक्षण गराउने सम्बन्धमा जापानको एनपीओ लालीगुराँस क्लबकी अध्यक्ष एकेमी मिजुबा र नेपाल तेक्वान्दो संघका अध्यक्ष प्रकाशशम्शेर राणाले शुक्रबार हस्ताक्षर गरे । नेपाली पारा टोलीले आगामी अगष्ट पहिलो साता जापानको भ्रमण गर्नेछ ।

सम्झौतापछि एनपीओ लालीगुराँस क्लबकी अध्यक्ष मिजुबाले जापानमा हुने प्रशिक्षण नेपाली पारा खेलाडीका लागि लाभदायक हुने विश्वास व्यक्ति गरिन् । संघका अध्यक्ष राणाले जापानमा हुने प्रशिक्षण ओलम्पिकका लागि उपलब्धिमुलक हुने विश्वास व्यक्त गरे ।

लालीगुराँस नेपालका अध्यक्ष रोशन श्रेष्ठको विशेष पहलमा जापानले पारा खेलाडीलाई प्रशिक्षण दिन लागेको हो । जापान जाने खेलाडी तथा प्रशिक्षकको सम्पूर्ण खर्च मिकी सिटी महानगरपालिकाले बेहोर्ने छ ।