नुवाकोट (हाम्रो खेलकुद) – आयोजक दुप्चेश्वर गाउँपालिका समुन्द्रटार र सोसल सर्भिस दोस्रो दुप्चेश्वर खुल्ला पुरुष भलिबल प्रतियोगिताको फाइनलमा प्रवेश गरेका छन् ।

कल्याण माध्यमिक विद्यालय समुन्द्रटारमा शुक्रबार भएको सेमिफाइनलमा आयोजक दुप्चेश्वरले पञ्चकन्यालाई ३–० को सेटमा पराजित गर्दै उपाधिनजिक पुगेको हो । एकपक्षीय बनेको खेलमा दुप्चेश्वरले पहिलो सेट २५–१९ ले जितेको थियो । दोस्रो र तेस्रो सेट क्रमशः २५–१९ र २५–१८ ले सहजै आफ्नो बनायो ।

अर्काे सेमिफाइनलमा सोसल युथ क्लबले कालिका युवा क्लबलाई ३–० को सोझो सेटमा हराएर फाइनलमा दुप्चेश्वरसँगको भेट पक्का ग¥यो । प्रतिस्पर्धात्मक बनेको खेलमा सोसलले पहिलो सेट २५–२२, २५–२२ र २५–२३ ले हात पारेको थियो ।

फाइनल र तेस्रो स्थानको खेल शनिबार हुने आयोजकले जनाएको छ । प्रतियोगिताको विजेताले १ लाख २५ हजार नगद पुरस्कार पाउनेछन् । त्यस्तै उपविजेताले ७५ हजार, तेस्रो हुनेले ५० हजार र सान्त्वनाले २५ हजार पुरस्कार पाउनेछन् ।

यस्तै उत्कृष्ट खेलाडीले ५ हजार पाउनेछन् । व्यक्तिगत विधातर्फ स्पाइकर, सेटर, डिफेन्डर र सर्भरले जनही ३–३ हजार रुपैया पाउने आयोजकले जनाएको छ ।