पुनम र बिमला एएसबीसी इलाईट बक्सिङलाई छनोट

काठमाडौं (हाम्रो खेलकुद) – विभागीय त्रिभुवन आर्मी क्लबका पुनम रावल, बिमला श्रेष्ठसहित चार खेलाडी एएसबिसी इलाईट महिला तथा पुरुष बक्सिङ प्रतियोगिताको लागि छनोट हुन सफल भएको छ ।

छनोट हुनेमा बिमला र पुनमसहित पुरुषमा आशिष दवाडी र सुशिल थापा रहेका छन् । शनिवार भएको महिलातर्फको ५१ केजी तौल समूहमा आर्मीकी बिमला श्रेष्ठले एपीएफकी माला राईलाई ४–१ ले अंकका आधारमा पराजित गरिन् ।

महिला ६० केजी तौल समूहमा आर्मीकी पुनम रावलले एपीएफकी संगिता सुनारलाई ४–१ ले अंकका आधारमा हराउदै छनोट भईन् ।

राष्ट्रिय खेलकुद परिषद्को सेमि कभर्डहमा भएको ९१ केजीमाथी को तौल समूहमा आर्मीकै आशिष दवाडीले गण्डकी प्रदेशका कुशल रानालाई ३५ सेकेन्डमै नकआउट पन्च हान्दै छनोट भए ।

शुक्रवार ४९ केजी तौल समूहको छनोट खेलमा आर्मीका सुशिल थापाले प्रदेश ३ का मदन डंगोललाई ५–० ले अंकका आधारमा हराउदै छनोट भएका थिए ।

थाईल्याण्ड बक्सिङ संघको आयोजनामा अप्रिल १६ देखि २६ सम्म बैंककमा संचालन हुने प्रतियोगिताका लागि छनोटमा परेका खेलाडीलाई नेपाल बक्सिङ संघका अध्यक्ष राम अवालेले बधाई तथा सफलताको शुभकामना दिए ।